LIGJET E BIZNESIT
Sulmet kibernetike ndaj Bankës së Shqipërisë dhe atyre të nivelit të dytë vijojnë. Shqetësimin e ngriti Guvernatori Gent Sejko në Konferencën Kombëtare për Sigurinë Kibernetike, një javë pasi ministri i Mbrojtjes Pirro Vengu paralajmëroi se vendi gjendej në shënjestër nga Rusia dhe Irani
“Sulmet kanë qenë të vazhdueshme ndaj Bankës Qendrore, për fat ne nuk jemi thyer. Po ashtu ndaj bankave të nivelit të dytë ka pasur sulme. Nga ana e bankave janë kryer investime të konsiderueshme për mbrojtjen kibernetike gjatë viteve të fundit, të cilat synojnë të mbrojnë bankat nga sulmet kibernetike dhe të rrisin sigurinë e të dhënave dhe infrastrukturës IT”, tha Gent Sejko.
Shqetësimit iu bashkua edhe Ministrja e Shtetit për Sipërmarrjen dhe Klimën e Biznesit, Delina Ibrahimaj duke kërkuar që “paratë e shqiptarëve në banka të mbesin të sigurta”
“Është një sektor mjaft i rëndësishëm dhe ka një specifikë që lidhet me paratë e konsumatorëve dhe publikun e gjerë. Nga njëra anë ne duhet të nxisim individët drejt pagesave digjitale, por nga tjera duhet të garantojmë sigurinë e tyre”, tha ministrja Ibrahimaj.
Pasi foli për investimet në drejtim të teknologjisë dhe suksesin e qeverisë në transformimin digjital, kreu i Autoritetit Kombëtar për Sigurinë Kibernetike, Igli Tafa nxori në pah një tjetër problem.
“Sot që ne flasim, vetëm për disa institucione që ne kemi marrë në analizë janë gjetur se mungojnë 180 burime njerëzore të specializuara në siguri kibernetike”, tha Igli Tafa.
E pranishme në konferencë, zëvendësministrja për Evropën dhe Punët e Jashtme, Silda Anagnosti, kërkoi angazhimin e specialistëve në diasporë në drejtim të sigurisë kibernetike në Shqipëri.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
