Kushtuan 6 milionë dollarë, satelitët “Albania 1 dhe 2” po përdoren për harta dhe fotografi

Tre zjarre në pyje, dy prej të cilave në Peshtan dhe Pishë-Poro të Fierit, një përmbytje dhe një rrëshqitje dheu… pas gati dy vitesh nga lëshimi në hapësirë, satelitët “Albania 1” dhe “Albania 2” nuk po përdoren mjaftueshëm… të paktën jo aq sa për të justifikuar koston 6 milionë dollarë.

“Hartat tematike e zonave të prekura nga zjarri në Peshtan dhe Pishë-Poro të Fierit janë krijuar duke përdorur Inteligjencën Artificiale me anë të metodës Change Detection me qëllim identifikimin dhe analizimin zonave të prekura dhe dëmeve të shkaktuara nga zjarri i ndodhur. Këto harta janë përdorur për analizimin dhe vlerësimin e zonës së dëmtuar”, thekson Ministria e Mbrojtjes.

Në komunitetin hapësinor, Shqipëria është prej 3 janarit të vitit të shkuar në mesin e 80 shteteve që kanë satelitë, listë që kryesohet nga Shtetet e Bashkuara të Amerikës që kanë mbi gjysmën, apo mbi 5 mijë satelitë, nga rreth 8700 në orbitë, sipas Kombeve të Bashkuara. Por, përfitimet deri më tani po shtrihen vetëm në drejtim të krijimit të hartave gjeo-hapësinore.

“Këto harta janë përdorur për analizimin dhe vlerësimin e zonës së dëmtuar ku janë paraqitur zonat e prekura nga zjarri me shtresat: ndërtesa, rrugë, zonat e prekura nga zjarri, sipërfaqe me bimësi të dendur; sipërfaqe me bimësi të ulët, pa bimësi, ranore apo ujore”, bën të ditur Ministria e Mbrojtjes.

Të dhënat nga ky dikaster tregojnë se deri në fund të qershorit të këtij viti, nga satelitët Albania 1 dhe Albania kanë përfituar, kryesisht imazhe… 29 institucione. Pjesa mëe  madhe e tyre agjenci, bashki dhe ministri.

“Është plotësuar lista e përbërë nga 22 persona si pika kontakti të 16 institucioneve përfituese nga projekti. Janë kryer takime me të gjithë pikat e kontaktit të institucioneve për t’i njohur me ecurinë e projektit si dhe me qëllim rritjen e kapaciteteve teknike të strukturave të cilat janë të përfshira në projekt. Gjatë vitit 2024 kemi kryer trajnime të veçanta me 38 Institucionet publike me pjesëmarrjen e 212 specialistëve”, thekson Ministria e Mbrojtjes.

Prej fillim-vitit të shkuar Shqipëria po fotografohet përsëri nga ajri përmes satelitëve Albania 1 dhe 2, me qëllim analizimin e problemeve të territorit, nga dëmet e shkaktuara nga zjarret, përmbytjet, menaxhimi i zonave të mbrojtura apo zonat me thatësirë të madhe që paraqesin rrezik për zjarre në të ardhmen. Megjithatë, nëse çmimi që paguam për këto dy satelitë do t’ia vlejë, mbetet ende për t’u parë./A2 CNN