Indeksimi elektoral i pensioneve, Ministri Gonxhe: Do të bëhet në prill

Qeveria do të bëjë indeksimin e pensioneve në muajin prill, përpara zgjedhjeve të përgjithshme parlamentare. Një premtim qartazi elektoral, duke qenë deri më tani indeksimi është bërë në tetor. Lajmi është bërë i ditur nga ministri i Ekonomisë, Blendi Gonxhe gjatë një takimi me pensionistë. Ndërkohë që indeksimi i pensioneve në prag të zgjedhjeve parlamentare 2025, do t’i kushtojë buxhetit të shtetit 50 milionë euro.

Formula e indeksimit të pensioneve ndryshoi në pranverën e 2023-shit, kur në prag të zgjedhjeve vendore qeveria e transferoi për në tetor. Por ajo ju dha pensionistëve një bonus, nga mbledhja e taksës nga kompanitë e mëdha energjetike. Për të rritur masën e pensionit qeveria ka në plan marrjen e masave për deklarimin e plotë të pagave nga bizneset me qëllim rritjen e sasisë së parave nga kontributet shoqërore dhe shëndetësore.

Qeveria në bashkëpunim me FMN dhe Bankën Botërore po punon për ndërtimin e një skeme të re pensionesh, me qëllim rritjen e masës së pensionit, sidomos për ata që përfitojnë më pak.