LIGJET E BIZNESIT
Nga Aurora Sulce, Producente Ekzekutive për Biznesin në A2 CNN
Vitin e ardhshëm, bashkitë do të marrin më shumë fonde nga buxheti i shtetit. Për rritjen e pagave të administratës vendore, por jo vetëm. Edhe për një mundësi menaxhimi më të mirë, në kushtet kur një pjesë e bashkive kanë probleme të theksuara financiare, por edhe faktit se 2025 është një vit zgjedhor dhe përballja për votat ndodh në terren, aty ku pushteti vendor është më afër.
Në buxhetin 2025, shpenzimet e buxhetit vendor janë parashikuar në masën 89.8 miliardë lekë, me një rritje prej rreth 10.5 miliardë lekë kundrejt buxhetit vendor të këtij viti. Në këtë zë është përllogaritur transferta e pakushtëzuar, thënë ndryshe fondet që qeveria jep për bashkitë; financimi i funksioneve të reja; financimi i rritjes së pagave; si dhe të ardhurat nga taksat dhe tarifat vendore, që siç shihet nga grafiku, vitin e ardhshëm parashikohet të kenë një rritje vjetore prej 3.6 miliardë lekë.
Por sa para më shumë do të japë qeveria për bashkitë vitin e ardhshëm?
Transferta e pakushtëzuar vitin e ardhshëm do të arrijë në 26.2 miliardë lekë. Thënë ndryshe, qeveria do të japë 1.9 miliardë lekë më shumë për bashkitë. Ky është niveli më i lartë i transfertës së pakushtëzuar në vitet e fundit.
Dhënia e më shumë financimeve për pushtetin vendor do të ndihmojë këtë të fundit të funksionojë më mirë dhe padyshim, synimi është që të ulen edhe borxhet. Detyrimet e prapambetura kanë arritur këtë vit më 4.2 miliardë lekë, duke qenë shqetësim veçanërisht për një pjesë të bashkive, që kanë mundësi dhe kapacitete të pakta në mbledhjen e të ardhurave.
