LIGJET E BIZNESIT
Besimi në ekonomi ka shënuar rritje në gusht, si pasojë kryesisht e optimizmit në sektorët e tregtisë, industrisë dhe të ndërtimit. Treguesi i Ndjesisë Ekonomike, që publikohet nga Banka e Shqipërisë u rrit me 1% muajin e kaluar. Niveli i këtij treguesi qëndron rreth 12 pikë përqindje mbi mesataren historike.
Vlen të theksohet se sektori që ka ndikuar negativisht tek besimi në ekonomi janë shërbimet, të cilat janë të lidhura ngushtësisht me turizmin. Një tjetër element ky që tregon se turistët e huaj nuk kanë shpenzuar shumë këtë verë.
Treguesi i besimit të industrisë (TBI) regjistroi rritje me 3.4 pikë përqindje në muajin gusht, duke qëndruar rreth 11 pikë përqindje mbi mesataren historike. Rritja e TBI-së këtë muaj u ndikua kryesisht nga vlerësimet më optimiste të bizneseve për nivelin e porosive të reja dhe për prodhimin industrial aktual. Ndërkohë, bizneset presin që prodhimi industrial dhe punësimi në të ardhmen të kenë një rënie të lehtë. Pritjet për çmimet në të ardhmen u rritën në krahasim me muajin e kaluar.
Treguesi i besimit në ndërtim (TBN) u rrit me 2.0 pikë përqindje në gusht. Niveli i tij aktualisht qëndron 24 pikë mbi mesataren historike dhe pranë maksimumit historik. Rritja e TBN-së këtë muaj u përcaktua nga vlerësimet pozitive për aktivitetin aktual ndërtues. Niveli i porosive të reja regjistroi rënie. Pritjet për çmimet që do të vendosin në të ardhmen janë vlerësuar në rënie.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Treguesi i besimit në shërbime (TBSH) shënoi rënie rreth 5 pikë përqindje në muajin gusht. Megjithatë, niveli i tij aktualisht qëndron rreth 14 pikë përqindje mbi mesataren historike. Rënia e TBSH-së u përcaktua si nga vlerësimet jo optimiste të bizneseve për ecurinë aktuale të aktivitetit të tyre, ashtu dhe nga ato për nivelin aktual të kërkesës. Pritjet për kërkesën në të ardhmen regjistruan rënie gjatë këtij muaji. Bizneset kanë rishikuar për lart ecurinë e çmimeve në të ardhmen.
Treguesi i besimit në tregti (TBT) u zgjerua me rreth 6 pikë përqindje në muajin gusht, i ndikuar kryesisht nga vlerësimet pozitive mbi ecurinë aktuale të biznesit dhe pritjet për punësimin. Bizneset e sektorit presin rritje të ecurisë së biznesit edhe në të ardhmen e afërt. Niveli aktual i TBT-së qëndron pranë vlerës më të lartë historike. Pritjet për çmimet në të ardhmen janë vlerësuar në rritje.
Treguesi i besimit konsumator (TBK) vijoi rritjen edhe në muajin gusht. Niveli aktual është 1.2 pikë përqindje më i lartë krahasuar me muajin e kaluar dhe 1.3 pikë përqindje mbi mesataren historike. Komponentët përbërës të TBK-së dhanë kontribut pozitiv në zgjerimin e treguesit. Vlera e TBK-së këtë muaj u përcaktua kryesisht nga pritjet më optimiste për situatën financiare dhe situatën ekonomike në vend. Gjithashtu, balanca aktuale dhe e pritur për blerjet në shuma të mëdha janë rishikuar lehtësisht për lart.
