LIGJET E BIZNESIT
Riaktivizimi i emigracionit vitet e fundit po shoqrëohet me më shumë të ardhura që emigrantët po sjellin pranë familjeve të tyre në atdhe. Sipas të dhënave të Bankës së Shqipërisë, në pjesën e parë të këtij viti, këto flukse valutore arritën në rreth gjysmë miliardi euro, niveli më i lartë në 16 vitet e fundit, që kur institucioni mbikëqyrës bankar e mat këtë tregues.
Kështu, sasia e eurove të dërguara pranë familjeve nga emigrantët, në periudhën janar-qershor të këtij viti arriti në 509 milionë euro, duke shënuar një rritje prej 66.9 milionë euro kundrejt të njëjtës periudhë të 2023-it.
Por këto janë vetëm flukset valutore që kanë hyrë në Shqipëri në rrugë formale, pasi realisht remitancat janë shumë të larta, po të kemi parasysh edhe kanalet informale.
Këto para konsiderohen shumë të rëndësishme për ekonominë, pais janë burim të ardhurash për 26% të familjeve shqiptare, ndikojnë në rritjen e konsumit, në hapjen e bizneseve të vogla dhe në shtimin e depozitave në sistemin bankar. Por nga ana tjetër, kanë edhe një efekt negativ që është dekurajimi i punësimit.
