LIGJET E BIZNESIT
Në nisjen e sezonit masiv të turizmit, biznesi vendas dhe konsumatorët po shfaqen pesimistë për ekonominë. Banka e Shqipërisë konstaton se Vrojtimi i Treguesit të Ndjesisë Ekonomikë ra në qershor me 2.6 për qind. Rënie ka pësuar besimi i të gjithë sektorëve, si tregtisë, shërbimeve dhe ndërtimit, përfshi besimin konsumator.
Treguesi i besimit në ndërtim ra me 2 pikë përqindje në qershor. Ky tregues qëndron 19.4 pikë përqindje mbi mesataren afatgjatë. Rënia e TBN-së u përcaktua kryesisht nga vlerësimet në rënie për aktivitetin aktual ndërtues dhe kontratat porositëse. Gjithashtu, pritjet për çmimet që do të vendosin në të ardhmen kanë regjistruar rënie, ndërsa ato për punësimin paraqiten në përmirësim.
Treguesi i besimit në shërbime ra me 3.8 pikë përqindje në qershor. Niveli i TBSH-së qëndron pranë vlerave më të larta historike, rreth 20 pikë përqindje mbi mesataren afatgjatë. Në rënien e TBSH-së kontribuuan vlerësimet më pak optimiste të bizneseve për ecurinë aktuale të aktivitetit të tyre. Pritjet e bizneseve për punësimin dhe çmimet në të ardhmen janë me rritje.
Treguesi i besimit në tregti regjistroi një rënie më të madhe krahasuar me treguesit e tjerë, duke zbritur me 4.8 pikë përqindje në këtë muaj. Ndonëse në rënie, niveli i TBT-së qëndron rreth 9.5 pikë përqindje mbi mesataren historike. Vlera aktuale e TBT-së u ndikua kryesisht nga vlerësime në rënie të ecurisë aktuale të biznesit dhe pritjeve për punësimin. Pritjet për ecurinë e biznesit në të ardhmen regjistruan gjithashtu rënie, kundrejt pritjeve në rritje për çmimet në të ardhmen.
Treguesi i besimit konsumator regjistroi një rënie të lehtë me 0.4 pikë përqindje në muajin qershor, duke zbritur afër nivelit të mesatares historike. Konsumatorët vlerësuan me rënie situatën e tyre financiare dhe situatën ekonomike të vendit në të ardhmen. Vlerësimi i tyre për blerjet në shuma të mëdha ra lehtë në muajin qershor. Pritjet për nivelin e përgjithshëm të çmimeve në të ardhmen janë rishikuar për poshtë.
