LIGJET E BIZNESIT
Dikur nuk i tatonin, më pas, nga viti 2021 industritë që përdorin gazin e lëngshëm u detyruan të paguanin një çmim të unifikuar 6 lekë/litër dhe nga 2023-shi u vendos të merrnin rimbursim.
Por sot rimbursimi nuk përfitohet më, ndërsa taksa vijon të paguhet. Në këtë situatë në Kuvend është depozituar një nismë përmes së cilës është po mazhoranca që do ta heqë akcizën për gazin e lëngshëm, i cili përdoret kryesisht për zhvillimin e aktivitetit në serat me ngrohje, por dhe llojet e ndryshme të industrive apo dhe agroindustrive. Nisma që mban firmën e deputetit Ismet Beqiri synon lehtësimin e kostos për produktet vendase dhe nxitjen e konkurueshmërisë me vendet e rajonit.”
“Akciza është një taksë që vendoset për të reduktuar përdorimin e një produkti të caktuar por në kushtet e industrisë nuk mund ta përdorësh. Mund ta përdorësh ëpr të reduktuar përdorimin e automjetit apo makinës për lëvizjet por jo për këto industri që prodhojnë produktet vendase. Për industritë e rënda të mesme apo ushqimore, gazi mund të zëri pjesë të rëndësishme. Ka industri që shkon deri 25% të kostos”, tha Alban Zusi.
Masa lehtësuese e rimbursimit pushoi së aplikuari në vitin 2024. Por sipërmarrësit thonë se ata nuk e përfituan as në vitin 2023, kur u mor vendimi që krahas akcizës të kishte rimbursim.
“Unë jam një ndër subjektet që jam në një lloj konflikti me doganat pasi edhe pse u dha e drejta rreth 6 muaj për t’u rimbursuar kjo gjë nuk ndodhi”, tha ai.
Në rajon industritë janë të përjashtuara nga akciza për gazin e lëngshëm për të nxitur në rritjen e prodhimeve vendase. Në vendin tonë totali i konsumit të gazit të lëngshëm nga industritë për vitin e kaluar arriti në 13 mijë e 414 ton. Dhe sipas Bashkimit të Prodhuesve Shqiptarë një heqje e kësaj akcize vetëm për gazet e naftës dhe hidrokarburet e tjera gazoike do t’i hiqte buxhetit të shtetit jo më shumë se 164 milionë lekë.
