LIGJET E BIZNESIT
Në Vlorë do të ndërtohet një nënstacion i ri elektrik. Kjo me qëllim garantimin e furnizimit të aeroportit të ri, por edhe gjithë zonës së jugut të vendit që po përjeton “bumin turistik”.
Në raportin e vlerësimit të ndikimit në mjedis të depozituar në Agjencinë Kombëtare të Mjedisit, Operatori i Sistemit të Shpërndarjes ka argumentuar edhe nevojën për nën-stacionin e ri.
“Duke parë gjendjen aktuale të rrjetit në zonën bregdetare që furnizon nën-stacionet Fier-Vlorë dhe problematikat me furnizimin me energji elektrike në periudhat e ngarkuara të verës, sidomos në nënstacionin Kafaraj i cili është nyja kryesore e furnizimit të këtyre nënstacioneve si ai i Mifolit, Hoxharës nga domosdoshmëria që lind për sigurinë e furnizimit të Aeroportit të ri Akërni-Vlorë nga dy burime të pavarura është menduar ndërtimi i një nënstacioni të ri.”
Nënstacioni i ri thuhet në dokumentet që shoqërojnë raportin teknik të projektit do të shërbejë si burim alternativ.
“Faza e parë e realizimit të projektit mundëson lidhjen me linjën Fier-TEC-nënstacioni Vlora 1, mund të furnizojë dhe të sigurojë me energji elektrike me standard dhe parametra teknikë gjithë zonën bregdetare të mësipërme. Nënstacioni i ri është menduar të ndërtohet në zonën afër fshatit Akërni, Bashkia Vlorë, për shkak të pozicionit gjeografik ku ndodhet edhe afër linjës 110kV edhe aeroportit të ri.”
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Pak ditë më parë ministrja e Infrastrukturës dhe Energjisë, Belinda Balluku gjatë inspektimit të punimeve në Aeroportin e Vlorës tha se deri më tani janë realizuar më shumë se 40 për qind e punimeve fizike. Aeroporti pritet që të përfundojë brenda 31 dhjetorit 2024 ndërkohë që do të ketë fazat e tij të testimit.
Aeroporti ndërkombëtar i Vlorës do të jetë i kategorisë 4E, me një pistë me gjatësi prej 3.2 kilometrash duke mundësuar edhe fluturimet transoqeanike.
