Edhe raporti më i fundit i Departamentit Amerikan të Shtetit theksoi plagën e korrupsionit gjerësisht të hapur në sektorët e administratës shtetërore. Ndërkohë qeveria prezantoi strategjinë ndërsektoriale me lupë të vendosur veçanërisht tek pronat, tatimet, kontratat publike, por edhe tek shëndetësia dhe arsimi. Qëllimi i kryesor është parandalimi.
“Qëllimi i Strategjisë Ndërsektoriale Kundër Korrupsionit 2024-2030, është që përmes një qasje të trefishtë të bazuar në parandalim, ndëshkim, dhe ndërgjegjësim të adresojë sfidat kryesore të luftës kundër korrupsionit. Kjo strategji ka në fokus të veçantë sektorët vulnerabël ndaj korrupsionit, përfshirë prona, shëndetësi, tatime, dogana, dhe arsim. Synimi i Strategjisë është të ofrojë një kuadër të përmirësuar ndjeshëm të koordinimit të të gjithë institucioneve përgjegjëse për luftën kundër korrupsionit”, tha Adea Pirdeni, ministre e Shtetit Për Amdinistratën dhe Korrupsionin.
Strategjia do të shtrihet edhe në nivel vendor. Por hetimi kundër korrupsionit parashikohet të mos ndalet vetëm në nivel publik, por dhe privat.
“Fusha të konsideruara me risk në sektorin privat për të cilat nuk është marrë ndonjëherë masa janë dhe sektori i minierave, turizmit, transportit, sportit, farmaceutikës dhe shëndetësisë private”, tha Pirdeni.
Strategjia ka një çmim. 1.2 miliardë lekë do shkojnë për fazën kryesore atë të parandalimit të korrupsionit. Për ndëshkimin e tij janë përcaktuar 282 milionë lekë, ndërsa 42.4 milionë lekë do të përdoren për ndërgjegjësim. Fatura finale luftës së re antikorrupsion do të mbulohet nga buxheti i shtetit, por edhe grantet private.
