Kthimi i vëmendjes si kurrë më parë në tregun e pasurive të paluajtshme ka bërë që ky sektor në Shqipëri të tërheqë gjithnjë e më shumë të huaj të investojnë.
Kjo tendencë në rritje nxiti dhe nevojën e zhvillimit për herë të parë në Shqipëri të panairit të pasurive të paluajtshme, me përfaqësues nga rajoni, Europa dhe më tej.
“Në Shqipëri janë të ulëta me shtete të tjera të rajonit. Kur të huajt vijnë dhe shohin këto oportunitete, e shikojnë si mundësi për të investuar. Shumë inkurajuese, shpresojmë se do jetë një shifër në rritje. Investime të tilla ndodhin në zonat e bregdetit. Kemi shtetas polak që kanë investuar shumë në Shëngjin, Golem dhe Vlorë. Siç ka dhe shtetas të tjerë që kanë investuar në Sarandë”, shprehet Ilda Zaloshnja, nga NAREA, shoqata e agjencive të pasurive të patundshme.
Në bumin e zhvillimit të këtij sektori, sfidat dhe problematikat vihen më në dukje të cilat sipas përfaqësuesve të tregut nuk po marrin ende zgjidhje. Reinaldo Pipiria, nga NAREA, deklaron: “Është momenti të shohim këtë barrë taksimi e cila padashje prodhon informalitet, evazione dhe efekte negative. Momenti i dytë ka të bëjë me dixhitalizimin, sidomos në kadastër, besojmë se është koha e duhur të dixhitalizohen titujt e pronësimit, por që në fund të kemi statistika”.
Rikthimi i rivlerësimit të pasurive të paluajshtme në 3%, nismë e deputetes Blerina Gjylameti, pritet të kalojë të mërkurën e ardhshme në Kuvend për diskutim. Por, nga ana tjetër, përballë kostove të larta, aktualisht blerja e një apartamenti për strehim nga qytetarët shqiptarë po bëhet i pamundur. Këtë e tregon edhe drejtori i Entit Kombëtar të Banesave, Stefan Çipa: “Nga 2007 e deri më tani u ka dhënë qytetarëve, por dhe banorëve që nuk kanë mundësi për të dalë në treg për banesa, mbi 1100 apartamente, ndërsa kreditë me pushtetin vendor shumë më tepër. Është mbi 60% e popullsisë në Shqipëri që nuk kanë mundësi të marrin një strehim me kosto të lartë”.
Ngritja e një platforme elektronike për përfshirjen e të gjitha bizneseve të sektorit të pasurive të paluajtshme është nisma e radhës që ky sektor do të ndërmarrë në vijim, ku të gjithë qytetarët do të kenë mundësi të studiojnë tregun.
