Inflacioni, treguesi që mat koston e jetesës në vend, ka shënuar një rritje të lehtë në maj, duke arritur në 2.2% dhe duke ndryshuar kursin 7 mujor të ecurisë në rënie të këtij treguesi. Instituti I Statistikave ka publikuar të dhënat, ku konstaton se në maj, ky tregues u rrit me 0.1% kundrejt prillit. Ndërsa kundrejt të njëjtës periudhë të një viti më parë, inflacioni ka rënë me 2.5%.
Të dhënat tregojnë se shkaku kryesor i rritjes të inflacionit në maj ka qenë shtrenjtimi i ushqimeve.
Grupet që kanë ndikuar tek inflacioni
Ndikimi i grupeve kryesore në ndryshimin vjetor të indeksit të çmimeve të konsumit. Rritja vjetore e çmimeve në muajin Maj është ndikuar kryesisht nga grupi “Ushqime dhe pije joalkoolike” me +0,69 pikë përqindje, pasuar nga grupi “Qira, ujë, lëndë djegëse dhe energji” me +0,42 pikë përqindje. Gjithashtu, çmimet e grupit “Mobilje, pajisje shtëpie dhe mirëmbajtje e shtëpisë” ndikuan me +0,28 pikë përqindje, çmimet e grupit “Pije alkoolike dhe duhan” me +0,15 pikë përqindje, çmimet e grupit “Mallra dhe shërbime të ndryshme” me +0,14 pikë përqindje, çmimet e grupeve “Veshje dhe këpucë” dhe “Hotele, kafene dhe restorante” me +0,11 pikë përqindje secili, çmimet e grupit “Argëtim dhe kulturë” me +0,08 pikë përqindje, çmimet e grupit “Shëndeti” me +0,07 pikë përqindje, çmimet e grupeve “Transporti” dhe “Shërbimi arsimor” me 0,06 pikë përqindje secili.
