Shqipëria ka pak a shumë të njëjtin nivel taksash me rajonin, por mbledh shumë më pak të ardhura se vendet e tjera (barra tatimore). Është ky një ndër përfundimet e raportit të publikuar nga qendra studimore Altax. Sipas të dhënave, në vitin 2023 ne mblodhëm të ardhura sa 25.8% e Prodhimit të Brendshëm Bruto, duke qenë të parafundit në rajon. Mbledhja e të ardhurave paraqitet me rritje në dy vitet e fundit. E fundit është Kosova me 25.7% të PBB-së, ndërkohë që në Maqedoninë e Veriut barra tatimore është sa 28.5% e PBB-së me rritje nga viti 2022 dhe 2021. Në Bosnjë-Hercegovinë është sa 36.1% e PBB-së me rritje nga viti 2022 dhe rënie nga vitit 2021. Në Malin e Zi është sa 36.2% e PBB-së me rritje nga viti 2022 dhe rënie nga 2021. Në Serbi është sa 37.1% e PBB-së me rënie nga viti 2022 dhe 2021.
Barra fiskale e vendeve të rajonit përbëhet në nivelin mbi 38% nga TVSH (përveç Bosnjë-Hercegovinës që përfshin edhe akcizën), 12% nga tatimi mbi kapitalin dhe 37% nga tatimet mbi punën (TAP dhe kontribute). Pjesa tjetër prej 13% përbëhet nga taksat nacionale, taksat dhe tarifat vendore dhe taksa doganore dhe akciza
Dy janë arsyet kryesore e kësaj performance të dobët në mbledhjen e të ardhurave, në kushtet kur niveli i taksave është pak a shumë i njëjtë: niveli i lartë i informalitetit dhe përjashtimet fiskale. Të dy këta faktorë përkthehen me mungesë të ardhurash në buxhetin e shtetit.
