Qeveria kalon në “sitë” agjencitë e punësimit. Kontrolle për garantimin e të drejtave të punonjësve

Ministri i Ekonomisë, Kulturës dhe Inovacionit, Blendi Gonxhja, nëpërmjet një publikimi në rrjete sociale, bën me dije se nga muaji ardhshëm, të gjitha agjencitë private të punësimit (APP) do t’i nënshtrohen një kontrolli të posaçëm inspektimi nga Inspektorati Shtetëror i Punës dhe Shërbimeve Shoqërore.

Ndër të tjera, Gonxhja thotë se monitorimet do të sjellin mbrojtjen e të drejtave të punëkërkuesve dhe punëofruesve.

“Gjatë muajit të ardhshëm, të gjitha agjencitë private të punësimit (APP) do t’i nënshtrohen një kontrolli të posaçëm inspektimi nga Inspektorati Shtetëror i Punës dhe Shërbimeve Shoqërore. Ky monitorim do te vlerësojë veprimtarinë dhe kushtet e këtyre agjencive, me qëllim mbrojtjen e të drejtave të punëkërkuesve dhe punëofruesve, verifikimin e zbatimit të detyrimeve ligjore ndaj aplikuesve dhe punëtoreve migrantë, punësimin e denjë dhe rekrutimin etik. Ky kontroll do të mundësojë një pasqyrë të qartë të performancës së këtyre agjencive dhe do të sigurojë që të vijojnë veprimtarinë vetëm ato agjenci që respektojnë standardet e vendosura në aktet ligjore dhe nënligjore për procesin e ndërmjetësimit për punësimin! Ndaj agjencive private të punësimit që kryejnë aktivitet në kundërshtim me legjislacionin në fuqi, do të ndërmerren masa administrative përkatëse deri në revokim të licencës”, shkruan Gonxhja.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern