Jo vetëm për turizëm, të huaj po blejnë prona në Shqipëri

Të huajt kanë shfaqur interes jo vetëm të për të kaluar pushimet në Shqipëri, por edhe për të investuar në tregun e pasurive të patundshme. Të dhënat e fundit të Bankës së Shqipërisë, bazuar në  një sondazh të Bankës së Shqipërisë me agjentë imobiliarë, tregojnë se në gjysmën e dytë të vitit që lamë pas, 26% e pronave janë blerë nga shtetas të huajt. Nga këta investitorë, 2/3 ishin nga vendet e Bashkimit Europian.

Banka Qendrore konstaton gjithashtu, se cmimi mesatar i banesave të shitura është ulur me 7.6% krahasuar me gjashtëmujorin e parë të vitit 2023, por ka mbetur 3.2% më lart se vlera e vitit paraardhës. Referuar të dhënave, për pronat e shitura në Tiranë, çmimet regjistruan një rënie prej 10.1% ndaj gjysmës së parë të vitit 2023, por janë rritur lehtë krahasuar me vitin 2022.

Kërkesa për prona të paluajtshme nga individë dhe biznese u mbështet nga kredia bankare, e cila ka vijuar të rritet me ritme të shpejta pavarësisht niveleve më të larta të normave të interesit. Kjo e fundit ka bërë që të rritet me 3.2% raporti i kredive me probleme. Konkretisht, 60% e pronave për banim dhe e atyre për përdorim tregtar janë blerë me hua bankare. Në 60% të rasteve, kredia ka mbuluar deri në 60% të vlerës.

Në fund të gjashtëmujorit të dytë të vitit të shkuar, teprica e kredisë së përgjithshme të individëve shënoi vlerën 180 miliardë lekë, duke u rritur me 4.7% gjatë periudhës dhe me 8.4% kundrejt një viti më parë.  Ndërsa kredia e marrë nga bizneset për pasuri të paluajtshme deri në fund të vitit 2023 zinte rreth 38% të tepricës së kredisë së përgjithshme të bizneseve.