Bashkëthemeluesi i Apple, Steve Wozniak, 73 vjeç, thotë se prindërit e tij, zgjodhën ta linin atë të ndiqte pasionet e veta – dhe ai është më i lumtur dhe më i suksesshëm për shkak të kësaj. Wozniak përdori të njëjtën strategji kur rriti fëmijët e tij.
“Prindërit e mi, më lejuan të ndjek zemrën time,” tha ai në një fjalim për studentët e diplomuar në Universitetin e Kolorados Boulder.
“Kur vërtet dëshiron diçka, dhe është pasioni yt, duhet të kesh prindër, që të mbështesin, duke ecur në të njëjtin drejtim me ty. Prindër që nuk ju thonë: “Jo, duhet të ndjekësh këto studime, duhet të shkosh në këtë universitet.”
I lindur në Kaliforni, Steve Wozniak filloi studimet në Universitetin e Kolorados Boulder në 1968, për shkenca kompjuterike.
Prindërit e tij, kishin mjaftueshëm para të kursyera për vetëm një vit shkollimi, tha ai – por, ata gjithsesi e inkurajuan atë, të ndiqte shkollën e zgjedhur prej tij dhe të ndiqte dashurinë e tij për teknologjinë, një fushë, që ata nuk e kishin idenë se do të bëhej kaq fitimprurëse.
Wozniak, u përjashtua në vitin 1969, pasi kishte hakuar sistemet kompjuterike të universitetit dhe kishte dërguar mesazhe për shaka.
Ai u ri-regjistrua në kolegj – fillimisht në Kolegjin De Anza, dhe më pas në Universitetin e Kalifornisë, Berkeley – dhe u prezantua me Steve Jobs nga një mik i përbashkët, përpara se të braktiste Berkeley në 1971.
Pesë vjet më vonë, Jobs dhe Wozniak bashkëthemeluan Apple. Të dy burrat, u bënë milionerë kur kompania u listua në bursë, në vitin 1980.
Sot, Apple ka një kapitalizim tregu prej 2.8 trilion dollarësh, dhe është kompania e dytë më e madhe në botë.
Tani, Wozniak thotë, që u jep fëmijëve të tij, të njëjtën mbështetje, që i dhanë prindërit.
“Unë jam sjellë në të njëjtën mënyrë me fëmijët e mi,” tha ai.
“Prindërit e mi, nuk më imponuan vlerat e tyre. Ata më lanë të zgjidhja vetë, kështu që, jam kujdesur të jem njësoj me fëmijët e mi.”
Taktika është efektive, sipas ekspertes të prindërimit Margot Machol Bisnow, e cila intervistoi prindërit e 70 të rriturve shumë të suksesshëm, për librin e saj të vitit 2022, “Raising an Entrepreneur: How to Help Your Children Achieve Their Dreams”.
Kur nuk inkurajoni pasionet e fëmijëve tuaj – veçanërisht nëse keni frikë, se nuk do të fitojnë mjaftueshëm para, kur të rriten – ju tregoni se nuk u besoni atyre, tha Bisnow.
Nivelet e larta të besimit dhe mbështetjes së fëmijëve, ndërtojnë besimin që atyre u nevojitet. për të shkëlqyer në çdo gjë që bëjnë, shtoi ajo.
