LIGJET E BIZNESIT
Jo vetëm biznesi, por edhe shteti është në hall për punonjës. Departamenti i Administratës Publike njofton se ka hapur 11 vende vakante pune, për të gjithë të rinjtë që disponojnë një diplomë bachelor në Shkenca Ekonomike; Juridike; Inxhinierike ; Natyrore dhe që nuk kanë eksperiencë pune.
Pozicionet e ofruara janë fillimisht në nivel specialisti dhe më pas punonjësit kanë mundësi të bëjnë rritje në karrierë si pjesë e administratës shtetërore.
Nga ana tjetër, edhe Agjencia Kombëtarë e Punësimit dhe Aftësive ka të shpallura aktualisht mbi 1700 vende të lira pune ku më së shumti kërkohen mësues për degë të ndryshme në ciklin 9 vjeçar dhe gjimnaz, farmacistë, laborantë dentarë, inxhinierë ndërtimi, menaxherë, arkëtar, ekonomistë, specialistë marketingu, etj
Ndër profesionet elementare apo zanatet kërkohen lavazhierë, marangozë, sanitarë, makinistë, kamarierë, rrobaqepës, punëtorë krahu, banakierë, kuzhinierë, punëtorë ambalazhimi, punonjës duro-alumini, mekanikë, shoferë, shitës, fermerë, mobilierë, etj. Të interesuarit mund të regjistrohen në portal duke ngarkuar cv-në e tyre dhe të aplikojnë për pozicionet që shikojnë me interes.
Kriza e kapitalit njerëzor ka ardhur për shkak të emigracionit të të rinjve drejt tregjeve evropiane të punës si dhe pretendimeve për paga më të larta duke qene se prej afro një viti kostot e jetesës janë shtrenjtuar ndjeshëm.
Vitin e kaluar qeveria ndërmori një reformë për rritjen e pagave në sektorin publik me synimin që këtë vit paga mesatare në administratë të arrijë në nivelin 900 euro, ndërsa ka ndërmarrë edhe një fushatë sensibilizimi në sektorin privat me qëllim ofrimin e pagesave më të mira për punonjësit.
