Të kujt janë paratë në banka? Më shumë se gjysma e depozitave zotërohen nga një “grusht” njerëzish

Pjesa më e madhe e parave të depozituara në banka zotërohen vetëm nga një “grusht” njerëzish. Në total, në fund të vitit të kaluar, në sistemin bankar ishin të depozituara 1.2 trilionë lekë. Të dhënat nga Agjencia e Sigurimit të Depozitave tregojnë se më shumë se gjysma, gati 690 miliardë lekë zotëroheshin nga vetëm 4.5 për qind e qytetarëve.

Agjencia nxjerr në pah gjithashtu se afro 1.7 milionë llogari kanë deri në 2.5 milionë lekë, ndërsa gati 900 mijë prej këtyre depozitave janë bosh, pra kanë më pak se 100 lekë në gjendje.

Marrë në rrafshin e familjeve, afërsisht 16 për qind e rreth 740 mijë familjeve në Shqipëri kanë 58 për qind të kursimeve në banka.

Po pse është kaq e theksuar fotografia “bardh e zi” e pabarazisë te shqiptarët?

“Duke marrë parasysh se 40 për qind e të ardhurave të individëve shkojnë për konsum bazë.. Kjo tregon nga ana tjetër që do të kemi nivel të ulët të kursimeve. Kjo rrjedhimisht përcjell efekte në ekonomi duke ngadalësuar shumë procese ekonomike”, tha Leons Hasani, ekspert për ekonominë.

Të dhënat nga Agjencia e Sigurimit të Depozitave tregojnë se në llogaritë e kurimeve me 100 e deri në 2.5 milionë lekë janë te depozituara 509.6 miliardë lekë apo 42.2 për qind e totalit. Edhe këtu ka dallime mes qarqeve të vendit.

“Në disa qarqe ka rritje, në disa qarqe ka rënie. Për shembull në qarqet e Veriut ke mi rënie të nivelit të të ardhurave të familjeve shqiptare, ndërkohë që në qarkun e Durrësit, Tiranës dhe Korçës kemi rritje të indeksuara të ardhurat me normën e inflacionit.”

Pabarazia në normën e kursimit është vetëm maja e ajsbergut të pabarazisë së përgjithshme të popullsisë. Shtresat e pasura të popullsisë, përveç llogarive bankare, mbajnë investime në prona të patundshme, biznese apo tituj borxhi.