I ftuar nga qendra Kombëtare e Librit dhe Leximit, Akademik, Profesor Doktor Anastas Angjeli zhvilloi një bisedë me gazetaren Monika Stafa, me fokus ekonominë e Shqipërisë të 30 viteve të fundit. Zhvillime ekonomike, të cilat akademik Angjeli i ka përmbledhur në kolanën me 8 botime voluminoze.
Kolana “Ditari i tranzicionit” sjell në kujtesë në mënyrë integrale historinë e zhvillimit ekonomik të Shqipërisë të pas viteve 90-të. “Kjo kolanë erdhi si pasojë e përgjegjësisë dhe detyrimeve personale të miat, së pari për të lënë një gjurmë në historinë e trazuar por dhe pasionante të tranzicionit shqiptar, sepse në literaturën dhe botimet shqipatre flitet shumë pak për zhvillimet ekonomike, financiare dhe sociale që janë bërë në Shqipëri. Jam përpjekur të përcjell për brezat e ardshëm pikërisht nga cfarë ekonomie kemi rrjedhur dhe drejt çfarë ekonomie po shkojmë”, u shpreh autori gjatë bisedës.
Kjo kolanë, si përmbledhje e ngjareve ekonomike në Shqipëri, për 30 vjet, vjen pak muaj pasi profesori mori çmimin “Eqerem Çabej”, çmimi më i rëndësishëm shkencor që akordohet nga Akademia e Shkencave. Akademik Angjeli është së pari intelektual i çmuar, ekonomist i përmasave evropiane, anëtar i ASHSH, anëtar i akademisë europiane të Shkencave, Doctor Honoris Causa në disa Universitete botërore, themelues dhe President i Universitetit Mesdhetar të Shqipërisë.
Prof Angjeli është padyshim një nga studiuesit më të njohur në lëmin e ekonomisë dhe veçanërisht ekonomisë financiare. Na ka dhuruar dhjetra publikime shkencore si autor dhe bashkëautor të publikuara në Shqipëri dhe jashtë vendit.Por jo vetëm kaq. Në këtë hark kohor ai ka mbajtur edhe mjaft detyra të larta shtetërore si deputet, Ministër i Ekonomisë, Ministër i Financave dhe Ministër i Punës dhe Çështjeve Sociale, anëtar i Këshillit Mbikqyrës së Bankës së Shqipërisë etj. Kolana “Ditari i Tranzicionit ekonomik”, ka disa specifika thelbësore. Është e para herë që një përmbledhje studimesh e analizash kaq voluminoze në ekonomi, të promovohet në një version integral të saj.
