Euro zbret sërish në nivel rekord

Euro është futur sërish në një trajektore të fortë rënëse, duke zbritur këtë javë në kuotën e 102.5 lekëve. Në harkun kohor të një viti, monedha europiane ka humbur më shumë se 10 lekë. Në prill të vitit të kaluar, euro shkëmbehej me 112.9 lekë.

Banka e Shqipërisë vlerëson se janë përmirësuar disa tregues në ekonomi që kanë cuar edhe në zhvlerësimin e euros dhe forcimin e lekut. Sipas saj, burimet e ofertës monetare në euro janë të ardhurat nga turizmi, investimet e huaja dhe remitancat. Konstatimet janë bërë në raportin vjetor të BSH-së për vitin 2023, të dorëzuar tashmë në Kuvend.

“Duke u fokusuar në zhvillimet e vitit 2023, forcimi i kursit të këmbimit duket se është diktuar nga një tepricë e lartë oferte në tregun e brendshëm valutor. Të dhënat e disponuara tregojnë se kjo tepricë oferte ka pasqyruar përmirësimin e ndjeshëm dhe përtej pritjeve të bilancit të shkëmbimeve tregtare e financiare të Shqipërisë me jashtë.

Për tre tremujorët e parë të vitit, suficiti rezultoi 0.2% të PBB-së, nga një deficit prej 5.9% të PBB-së në vitin 2022. − Përmirësimi i llogarisë korrente u nxit nga rritja e lartë e flukseve hyrëse të turizmit. Për tre tremujorët e parë të vitit, të ardhurat nga turizmi prodhuan një fluks valutor prej 3.2 miliardë eurosh, me rritje vjetore prej 46.6%. Ndikime të mëtejshme pozitive kanë ardhur nga rritja e remitancave, të cilat ishin rreth 676 milionë euro në këta tre tremujorë, ose 14.2% më të larta se një vit më parë. − Investimet e huaja direkte kanë vijuar të rriten, duke përbërë një burim tjetër oferte valutë përtej suficitit të llogarisë. Ato rezultuan rreth 1.08 miliardë euro në tre tremujorët e parë të vitit, ose 10.6% më të larta se një vit më parë. Këto zhvillime rezultuan në tepricë oferte të valutës në ekonomi, e cila, në kushtet e një regjimi të lirë të kursit të këmbimit, diktoi mbiçmimin e monedhës vendase”, theksohet në raportin e BSH-së.

Institucioni mbikëqyrës bankar vlerëson se krahas zhvlerësimit të euros, ka ndodhur edhe forcimi i lekut për shkak të rritjes së besimit të qytetarëve tek monedha kombëtare.