Vendet me ekuilibrin më të mirë punë-jetë

Në këtë epokë pas pandemisë, shumë punonjës punojnë nga distanca. Puna nga shtëpia mund t’i ndihmojë njerëzit të menaxhojnë përgjegjësitë e tyre profesionale dhe personale. Por, puna në distancë ka mjegulluar gjithashtu vijën, që ndan fundin e punës dhe fillimin e jetës personale, duke e bërë ende të pamundur arritjen e ekuilibrit punë-jetë. Market Australia, një kompani që ofron analiza dhe krahasime të tarifave të sigurimit, së fundmi renditi 40 vende, sipas ekuilibrit punë-jetë, që ato ofrojnë.

Gjendja e çdo vendi për vitin 2024, u përcaktua nga tetë faktorë: numri mesatar i orëve të punës në vit, minimumi i pushimit vjetor të paguar dhe pushimin mjekësor, kohëzgjatjet dhe tarifat e pushimeve të mëmësisë dhe atësisë, dhe rezultati i lumturisë së vendit, bazuar në anketat e Gallup World Poll.

Vendet e Europës dominuan të gjithë gjysmën e parë të listës, gjë që tregon, se rajoni bën një punë të shkëlqyer për të mbështetur punonjësit, në ruajtjen e një ekuilibri pozitiv punë-jetë.

Spanja zuri vendin e parë, duke u ofruar punëtorëve 30 ditë pushim vjetor me pagesë dhe gjashtë (ose më shumë) javë pushim mjekësor me pagesë, ndërsa gjithashtu u paguan prindërve 100% të pagave të tyre gjatë kur marrin leje.

Më e rëndësishmja, Spanja u jep leje të ngjashme si nënave (16 javë) dhe baballarëve (12 javë), dhe u jep shumë më shumë leje baballarëve se shumica e vendeve të tjera. Leja më bujare atërore ofrohet në Portugalinë fqinje (pesë javë me 100% të pagës) dhe Slloveni (katër javë me 100% të pagës).

Më poshtë janë renditur 20 vendet me ekuilibrin më të mirë punë-jetë:

1. Spanjë
   2. Luksemburg
   3. Francë
   4. Holandë
   5. Finlandë
   6. Bullgari
   7. Slloveni
   8. Estoni
   9. Lituani
   10. Austri
   11. Portugali
   12. Suedi
   13. Danimarkë
   14. Poloni
   15. Itali
   16. Rumani
   17. Belgjikë
   18. Hungari
   19. Letoni
   20. Greqi

Të gjitha këto vende, ofrojnë 20-30 ditë pushimi të paguar dhe gjashtë ose më shumë javë pushim mjekësor të paguar çdo vit.

Bullgaria ofron pushimin më të madh të mëmësisë: 58 javë me 90% të pagës. Greqia nuk ofron fare leje atësie, ndërsa Holanda, Suedia, Italia dhe Rumania ofrojnë vetëm një javë.

Në Gjermani, njerëzit punojnë më pak orë në vit, mesatarisht 1,340.9, në Danimarkë 1,371.6 orë, të ndjekur nga norvegjezët me 1,424.6. Danimarka gjithashtu, arriti një nga rezultatet më të larta në indeksin e lumturisë, e kryesuar nga Finlanda. Luksemburgu, Holanda dhe Austria ishin gjithashtu të renditur mirë.

Vendet e Amerikës së Jugut (asnjë prej të cilave nuk shfaqet në 20 vendet e para në përgjithësi), fituan tre vendet e para për numrin më të madh të orëve të punës. Kolumbianët punojnë më shumë, me 2,405.5 orë në vit – 1.8 herë më shumë se punëtorët gjermanë. Meksika (me 2226.3 orë) dhe Kili (me 1.962.8 orë) renditen afër.

Në SHBA, mesatarja për punëtorët, bie midis homologëve të tyre të Amerikës së Jugut dhe Europës, me 1,810.9 orë të punës në vit. Por, është mungesa e pushimeve të paguara – vjetore, për arsye shëndetësore dhe familjare – që e vendos vendin në fund të listës në përgjithësi. Kanadaja dhe Irlanda gjithashtu u renditën në fund./huffpost