Llogaritet mbi 2.9 milionë numri i llogarive bankare të qytetarëve shqiptarë në fund të vitit që lamë pas. Statistikat janë publikuar nga Banka e Shqipërisë dhe tregojnë se gjate vitit 2023 u hapën 123 mijë 812 llogari të reja në degët e 11 bankave tregtare në vend. Krahasuar me vitin 2020, numri i llogarive bankare të zotëruara nga qytetarët është zgjeruar me gati 250 mijë.
Ekspertët shpjegojnë se rritja e numrit të llogarive bankare lidhet jo vetëm me marrjen e pagave në kanalet bankare apo kursimeve, por edhe me blerjet online. Por sipas tyre, pavarësisht progresit të bërë në 5 vitet e fundit, situata ka ende vend për përmirësim.
Ndërkaq nuk janë vetëm shqiptarët ata që po hapin llogari në bankat vendase, por edhe të huajt. Sipas të dhënave nga Banka e Shqipërisë, numri i llogarive bankare të zotëruara nga të huajt arriti në mbi 60 mijë nga rreth 50 mijë që ishin në fund të vitit 2022.
Pjesa më e madhe e llogarive bankare të të huajve, mbi 58 mijë zotërohen nga individë, ndërsa pjesa tjetër nga sipërmarrësit. Ekspertë të sistemit të pagesave vlerësojnë se ka nevojë për lehtësi procedurale në drejtim të çeljes së llogarive në banka nga sipërmarrësit e huaj.
Të dhënat nga Banka e Shqipërisë tregojnë se llogaritë bankare nga sipërmarrësit shqiptarë, kanë shkuar në linjë të zhdrejtë me individët vitin e fundit. Nga gati 240 mijë në 2022-shin, numri i llogarive të bizneseve u tkurr në pak më shumë se 232 mijë vitin e shkuar.
