Gjatë vitit 2023, emigrantët shqiptarë dërguan pranë familjeve të tyre në atdhe një shumë prej 920 milionë euro. Kundrejt një viti më parë, është shënuar një rritje me 11.3%. Ky është rekordi historik i shënuar që prej vitit 2008, kur Banka e Shqipërisë nisi ta masë këtë tregues.
Riaktivizimi i emigracionit vitet e fundit, vecanërisht drejt vendeve të fuqishme europiane si Gjermania dhe Britania e Madhe vlerësohet të ketë ndikuar në rritjen e ndjeshme të fluksit të remitancave.
Por sa para dërgohen nga emigrantët sipas shteteve?
Të dhënat nga operatorët e tregut, Easy Pay dhe Ria Money Transfer bëjnë të ditur se nga Gjermania janë dërguar gjatë vitit të kaluar mesatarisht 600 euro; nga Britania e Madhe rreth 750 euro; nga Italia që janë edhe emigrantët e parë të pas viteve ’90 mesatarisht 300 euro dhe nga shtetet e tjera shumat variojnë mesatarisht nga 400-500 euro.
Operatorët e tregut bëjnë të ditur se ndërsa tregu i remitancave rritet, për shkak se numri i emigrantëve mbetet i lartë, fluksi në total i remitancave është ne rritje, shuma individuale të dërguara pranë familjeve janë në rënie. Nga ana tjetër, konstatohet një rritje e lartë e dërgesave nga Shqipëria drejt vendeve të tjera, gjë që shpjegohet deri diku me ardhjen e punëtorëve të huaj.
