Emigrantët kanë dërguar një nivel rekord të ardhurash pranë familjeve të tyre në atdhe. Gjatë vitit 2023, niveli i remitancave arriti në rreth 930 milionë euro, duke shënuar një rritje prej 11.3% kundrejt një viti më parë. Ky është niveli më i lartë i flukseve valutore të dërguara nga emigrantët që prej vitit 2008, kur Banka e Shqipërisë raporton të dhënat. Në krahasim me vitin 2013, kur remitancat kishin hyrë në cikël rënës, fluksi pothuajse është dyfishuar.
Një ecuri e tillë shpjegohet me riaktivizimin e emigracionit. Gjatë viteve të fundit, emigrimi, kryesisht i të rinjve ka qenë intensiv dhe janë këta emigrantë të rinj që kanë rritur fluksin e remitancave, nëpërmjet parave të dërguara në atdhe.
Sipas të dhënave të Institutit Europian të Statistikave, shtimi i flukseve emigratore është reflektuar në rritjen e ndjeshme të lejeve të qëndrimit, që vendet e Bashkimit Europian kanë dhënë për shtetasit shqiptarë gjatë viteve të fundit.
Sipas Eurostat, në 2022 rreth 74 mijë shtetas shqiptarë (73,858) morën leje qëndrimi në një nga vendet e BE-së. Në krahasim me një vit më parë, numri i lejeve është rritur me 34%.
Operatorët e tregut pohojnë se Italia dhe Greqia janë kanalet kryesore nga dërgojnë paratë emigrantët, por vitet e fundit janë shtuar dhe prurjet nga Gjermania dhe Mbretëria e Bashkuar, që janë në linjë me tendencat e reja të emigracionit.
Por nuk është vetëm faktori i emigrimit. Nuk përjashtohen edhe flukset valutore që vijnë nga jashtë nga burimet informale, të cilat kanë qenë gjithmonë të pranishme në tregun shqiptar.
