LIGJET E BIZNESIT
Bizneset dhe konsumatorët janë pesimistë për ekonominë. Treguesi i besimit në ekonomi është në rënie për të dytin muaj rradhazi. Sipas vrojtimit të Bankës së Shqipërisë, Treguesi i ndjesisë ekonomike shënoi në shkurt një rënie prej 2.6 pikësh në krahasim me janar. Ngadalësimi u përcaktua nga rënia e besimit konsumator, si dhe rënia e besimit në sektorët e industrisë, shërbimeve dhe tregtisë. I vetmi sektor që ka shënuar rritje të besimit është ndërtimi.
Treguesi i besimit të industrisë (TBI) ra me 8.6 pikë përqindje në muajin shkurt, i ndikuar nga vlerësimet jo shumë optimiste për prodhimin aktual dhe për kontratat porositëse. Niveli i TBI-së është pothuajse i njëjtë me mesataren e vet historike. Pritjet e bizneseve të këtij sektori për prodhimin, punësimin dhe çmimet në të ardhmen janë në rënie krahasuar me ato të një muaji më parë.
Treguesi i besimit në ndërtim (TBN) u rrit me 6.8 pikë përqindje në muajin shkurt. Ky tregues qëndron rreth 25 pikë përqindje mbi mesataren afatgjatë. Rritja këtë muaj u përcaktua kryesisht nga vlerësimet më të mira për aktivitetin aktual ndërtues. Paralelisht me të, pritjet për punësimin dhe ato për çmimet në të ardhmen janë në rritje.
Treguesi i besimit në shërbime (TBSH) ra me 2.2 pikë përqindje. Megjithatë, niveli i TBSH-së qëndron rreth 6 pikë përqindje mbi mesataren afatgjatë.Të dy komponentët përbërës të treguesit, ecuria aktuale e aktivitetit si dhe niveli i kërkesës, kanë regjistruar rënie. Pritjet e bizneseve për çmimet në të ardhmen janë gjithashtu në rënie.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Treguesi i besimit në tregti (TBT) u tkurr me rreth 10 pikë përqindje në muajin shkurt, i ndikuar kryesisht nga vlerësime jo optimiste mbi ecurinë aktuale të biznesit dhe pritjet për punësimin. Bizneset e sektorit presin rënie të porosive dhe të ecurisë së biznesit edhe në të ardhmen e afërt. Niveli aktual i TBT-së qëndron pranë mesatares historike. Pritjet për çmimet në të ardhmen janë vlerësuar në rritje.
Treguesi i besimit konsumator (TBK) vijoi rënien për të katërtin muaj radhazi, duke zbritur me 0.8 pikë përqindje në muajin shkurt. Megjithatë, niveli aktual i treguesit mbetet pranë mesatares historike. Vlera e TBK-së këtë muaj u përcaktua nga pritjet më pak optimiste për situatën financiare dhe blerjet në shuma të mëdha për të ardhmen. Pritjet për nivelin e përgjithshëm të çmimeve dhe për punësimin në të ardhmen janë rishikuar në rënie.
