Sezoni turistik në Shqipëri po shtrihet përtej periudhës së verës, duke u bërë gjithë vjetor. Të dhënat e fundit të Institutit të Statistikave tregojnë se gjatë shkurtit numri i shtetasve të huaj që kanë hyrë në territorin shqiptar është 480.539. Ky numër është rritur me 55,4 %, krahasuar me të njëjtën periudhë të vitit 2023. Ndërsa si periudhë 2-mujore, kanë hyrë në territorin shqiptar 970.138 shtetas të huaj, me rritje 41.3% kundrejt të njëjtës periudhë të një viti më parë.
Por krahas të huajve që kanë vizituar Shqipërinë, statistikat tregojnë se është rritur ndjeshëm numri i qytetarëve shqiptarë që janë larguar gjatë vendit. Në shkurt të këtij viti, daljet e shqiptarëve nga territori vlerësohen në 507.095 persona. Krahasuar me Shkurt 2023, ky tregues është rritur me 30,1 %. Ndërsa si periudhë 2-mujore (janar-shkurt 2024) kanë dalë jashtë Shqipërisë 1.041.171 shtetas shqiptarë, me rritje 23.6% kundrejt të njëjtës periudhë të një viti më parë.
Të dhënat e INSTAT-it tregojnë gjithashtu, se në shkurt të këtij viti, rajoni me numrin më të lartë të hyrjeve të shtetasve të huaj në Shqipëri është rajoni i Evropës me 459.700 shtetas, pasuar nga Amerika dhe Azia Lindore dhe Paqësori, përkatësisht me 8.147 dhe 2.979 shtetas.
Në Shkurt 2024, krahasuar me të njëjtën periudhë të një viti më parë, hyrjet e shtetasve të huaj kanë shënuar rritje: për qëllime personale me 55,4 %; për qëllime pushime, vizitë tek të afërm, etj. me 56,9 %; për biznes dhe qëllime profesionale me 53,9%.
