LIGJET E BIZNESIT
Porti i ri tregtar në Porto Romano do të ndërtohet me fonde të buxhetit të shtetit, dhe jo me financim të huaj sikurse parashikohej në ligjin fillestar të buxhetit 2024. Përmes Aktit Normativ të miratuar në qeveri të mërkurën, për këtë vepër portuale janë akorduar 9.88 mld lekë, sipas kërkesës së Ministrisë së Infrastrukturës dhe Energjisë.
Po ashtu, parashikohet mbështetje buxhetore me 14.7 mld lekë për secalin nga vitet 2025 dhe 2026. Në buxhetin fillestar financimi ishte parashikuar në vlerën e 50 mln lekëve, ndërsa 8.66 mld lekë të tjera parashikohej të siguroheshin nga financimi i huaj.
Ndërkaq, sipas relacionit shoqërues të Aktit Normativ në Kuvend, argumentet në mbështetje të këtij ndryshimi lidhen kryesisht me rëndësinë strategjike të projektit madhor i cili përmbush standardet ndërkombëtare, teknologjikisht të përparuara dhe ekologjike, të cilat do të garantojnë plotësimin e kërkesave të Shqipërisë dhe vendeve të Rajonit sa i takon transportit detar.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Sipas relacionit, Porti i ri në Porto Romano do të krijojë një hapësirë logjistike, që do të shërbejë si qendër për rritjen e mëtejshme ekonomike për zonën Tiranë-Durrës dhe trajtimin e ngarkesave tranzit në port.
Po ashtu, sipas relacionit, ai do të vendosë Shqipërinë si nyje në rrjetet infrastrukturore rajonale, duke sjellë rritje dhe përmirësime në aspektin e zhvillimit ekonomik e social të vendit. Ndaj, financimi me mbështetje të drejtpërdrejtë buxhetore siguron përshpejtimin e procedurave të domosdoshme për fillimin dhe avancimin e punimeve.
Në total, buxheti për transportin detar, parashikohet në 10.04 mld lekë, nga 8.81 mld lekë që ishte në ligjin fillestar. Ndryshime në financim nuk kanë pësuar vetëm shpenzimet korrente, ku përfshihen pagat e punonjësve./TV Scan
