LIGJET E BIZNESIT
Përveç Institutit të Statistikave, të dhënat për turizmin do të publikohen edhe nga një strukturë e re që do të krijohet nën varësinë e Ministrisë së Turizmit dhe Mjedisit. Kjo është parashikuar në projektligjin “Për turizmin” që ëhstë dorëzuar në Kuvend për t’iu nënshtruar diskutimit në komisionet parlamentare.
“Në nenin 5 të projektligjit është parashikuar shtimi i nenit 11/1 pas nenit 11, të ligjit bazë, në kuadër të krijimit të një sistemi statistikor të unifikuar dhe gjithëpërfshirës, i cili do të grumbullojë të dhëna nga subjekte të ndryshme, si dhe në kuadër të krijimit të Këshilli Ndërinstitucional për Statistikat në Turizëm (në vijim KNST). Duke qenë se do të jenë disa institucione të përfshira në procesin e përcjelljes së të dhënave statistikore, Këshilli do të ketë përbërje ndërinstitucionale për një koordinim dhe bashkëpunim sa më efikas. Institucioni përgjegjës për drejtimin e këtij Këshilli do të jetë Ministria e Turizmit dhe Mjedisit dhe struktura përgjegjëse për statistikat në turizëm do të shërbejë si sekretariat teknik. Ky nen parashikon detyrat konkrete të KNST-së”, theksohet në relacionin që shoqëron projektligjin.
Në draft theksohet nuk struktura e re nuk prek kompetencat e INSTAT, pavarësisht se do të publikojë të dhëna që deri më tani i nxjerr ky institucion.
“KNST-ja nuk ndërhyn në kompetencat e Institutit të Statistikave, pasi qëllimi i krijimit të tij është grumbullimi dhe përpunimi i të dhënave në turizëm, si një hap më afër binjakëzimit me Eurostat-in. Krijimi i KSNT-së nuk do të ketë kosto shtesë në buxhetin e shtetit, pasi pjesëmarrja e anëtarëve do të jetë pa pagesë”, theksohet në relacion.
Sipas projektligjit, bizneset e sektorit të turizmit duhet t’i raportojnë në kohë reale të dhënat e tyre pranë Këshillit Ndërinstitucional për Statistikat në Turizëm.
