LIGJET E BIZNESIT
Dy ditë më parë, kryeministri Rama u ul me përfaqësuesit e industrisë fason për të diskutuar zgjidhjet e mundshme për të shpëtuar sektorin nga kriza. Një takim i zhvilluar në Shtëpinë e Biznesit, në prani edhe të disa ministrave të tjerë, si Delina Ibrahimaj, Ervin Mete dhe Blendi Gonxhe.
Qeveria i propozoi fasonistëve një paketë masash, që konsistonin: në rimbursimin më të shpejtë të TVSH-së, nga 30 ditë që është afati ligjor aktualisht në mundësisht 10 ditë; në gjetjen e një mekanizmi lehtësues (overdraft) për të siguruar likuiditet për kompanitë dhe në vendosjen e një garancie sovrane për investime. Kjo masë e fundit do t’iu shërbejë fasonistëve që të kalojnë nga regjimi me material porositësi në ciklin e mbyllur, me qëllim prodhimin “Made in Albania”.
Një ristrukturim i domosdoshëm, duke pasur parasysh të ardhmen e Shqipërisë në Bashkimin Europian dhe ku në ekonominë europiane nuk ekzistojnë fasonët.
“Ne jemi shumë të kënaqur që u ulëm me kryeministrin për problemet e industrisë, pasi e kërkonim këtë prej shumë kohësh. Paketa e masave është kërkuar prej nesh që në vitin 2021 dhe nëse do të ishte zbatuar që atëherë, sot shumë kompani do të ishin në cikël të mbyllur. Ristrukturimi i kompanive fason është një domosdoshmëri dhe paketa e masave është një ndihmë dhe sinjal pozitiv”, shprehet Florian Zekja, nënkryetar i Pro Eksport Albania për Fast News Economy.
Industria fason ndodhet në vështirësi për shkak të ndikimit të disa faktorëve, si rritja e çmimeve nga konjukturat ndërkombëtare, rritja e kostove të punës dhe së fundmi, edhe zhvlerësimi i fortë i euros. Ky sektor konsiderohet i rëndësishëm vecanërisht për punësimin e mbi 75 mijë personave, kryesisht grave dhe vajzave me nivel të ulët arsimimi dhe nga zonat periferike.
