LIGJET E BIZNESIT
Nga Aurora Sulce
Në kulmin e tensioneve politike mes opozitës dhe mazhorancës, Ministria e Financave ka dorëzuar në Kuvend buxhetin 2024, draftin më të rëndësishëm të financave publike. Por sa i plotëson ky buxhet prioritetet e shpallura më herët nga qeveria dhe të reflektuara në programin e saj?
Katër janë prioritetet kryesore të qeverisë Rama 3: Rritja e pagave; ulja e borxhit; investimet në infrastrukturë dhe digjitalizimi.
Po sa para janë dhënë në vite nga buxheti për këto prioritete?
Shpenzimet për personelin janë rritur ndjeshëm vitet e fundit nga 90.6 miliardë lekë në vitin 2022 në mbi 119 miliardë të parashikuara vitin e ardhshëm. Diferenca e madhe ka ardhur si pasojë e rritjes së numrit të punonjësve të administratës dhe pagave të tyre.
Një tjetër prioritet i qeverisë është konsolidimi fiskal ose thënë ndryshe ulja e borxhit.
Qeveria ka parashikuar në buxhetin 2024, që borxhi publik të zbresë në 59.8%, niveli më i ulët që nga viti 2011.
Kjo politikë e reduktimit të ndejshëm të borxhit do të kërkojë më shumë fonde për pagesën e interesave.
Sipas të dhënave të projektbuxhetit, vitin e ardhshëm do të paguhen 66.2 miliardë lekë interesa për borxhin e brendshëm dhe të jashtëm, shumë më shumë se në vitet e mëparshme.
Prioriteti i tretë i qeverisë është infrastruktura, kryesisht ajo rrugore.
Vitin e ardhshëm, qeveria ka parashikuar në buxhet 128.5 miliardë lekë investime, me rritje modeste kundrejt një viti më parë. Ndërsa kundrejt prodhimit të brendshëm bruto, investimet publike rezultojnë në rënie.
Prioriteti i katër madhor i qeverisë është digjitalizimi. Fondet për digjitalizimin janë të shpërndarë në sektorë të ndryshëm, duke qenë se vetë ky proces është ndërsektorial./A2 CNN
