Zgjatet sezoni turistik, 1.1 milionë pushues të huaj në shtator

Temperaturat e larta dhe jehona si një destinacion interesant për t’u zbuluar kanë zgjatur sezonin turistik të Shqipërisë edhe në shtator. Instituti i Statistikave raporton se muajin e kaluar e vizituan vendin 1.1 milionë pushues të huaj. Kundrejt të njëjtës periudhë të një viti më parë kemi një rritje të numrit të turistëve të huaj me 45 për qind. Pjesa më e madhe e tyre rezulton të ketë ardhur në grupe për të bërë tur.

Marrë në harkun e 9 muajve, vendin rezulton ta kenë vizituar gati 8.3 milionë të huaj nga rreth 6.4 milionë në po të njëjtin hark kohor të një viti më parë.

Pritshmëri optimiste operatorët kanë edhe për vitin e ardhshëm, teksa tregojnë se tashmë kanë nisur edhe prenotimet nga të huajt.

Pjesa më e madh e të huajve që hynë në vend në harkun e muajve janar-shator kanë ardhur për pushime, ndërsa një pjesë tjetër e konsiderueshme kanë hyrë në Shqipëri kalimthi. Sipas INSTAT, rreth një mijë të huaj kanë hyrë në vend për qëllime shëndetësore dhe fetare.