Rritja e cmimeve ka goditur buxhetet e familjeve shqiptare. Banka e Shqipërisë ka publikuar Vrojtimin mbi gjendjen financiare dhe huamarrjen e familjeve, ku ka konstatuar se rritja e shpenzimeve ka qenë më e lartë se rritja e të ardhurave të tyre, duke reflektuar shtrenjtimin e kostos së jetesës.
“Gjatë 6-mujorit në analizë, pjesa më e madhe e familjeve (rreth 45%) vijojnë të deklarojnë të ardhura mujore në nivelin “17-50 mijë lekë”, por kjo peshë ka rënë me 2 për qind krahasuar me gjashtëmujorin e kaluar dhe me 7 për qind krahasuar me një vit më parë. Nga ana tjetër, struktura e shpërndarjes së familjeve sipas nivelit të të ardhurave mujore, duket se ka vijuar të zhvendoset drejt niveleve më të larta si “50-100 mijë” (34% të familjeve) dhe “100-200 mijë (12% e familjeve).
Në shpërndarjen e familjeve sipas nivelit të shpenzimeve të domosdoshme të jetesës, gjatë periudhës vihet re që struktura ka vijuar të zhvendoset drejt dy niveleve më të larta të shpenzimeve mujore (“50 mijë-10 mijë lekë” dhe “mbi 100 lekë në muaj”), duke reflektuar në këtë mënyrë rritjen e kostos së jetesës së familjeve për shkak të rritjes së çmimeve në vend.
Në bazë të përgjigjeve të mësipërme, rezulton se Indeksi i të ardhurave dhe Indeksi i shpenzimeve kanë shënuar rritje gjatë periudhës, por rritja e indeksit të shpenzimeve ka qenë më e lartë se rritja e indeksit të të ardhurave”, theksohet në Vrojtimin e Bankës së Shqipërisë.
Inflacioni është futur në trend rënës muajt e fundit, por rritja e çmimeve mbetet e lartë tek produktet ushqimore, që janë edhe baza e konsumit të një familje. Sipas të dhënave të Institutit të Statistikave, në gusht inflacioni shënoi 4 për qind, ndërsa inflacioni i produkteve ushqimore u përllogarit në 7.8 për qind.
