Qeveria rishikon buxhetin, ja ku do të rishpërndahen 46 miliardë lekë

Qeveria do të rishpërndajë suficitin e të ardhurave që është krijuar këtë vit në buxhet nga rritja e çmimeve. Këshilli i Ministrave ka miratuar Aktin Normativ për ndryshime të Buxhetit të vitit 2023.

Ministri i Financave dhe Ekonomisë, Ervin Mete ka dhënë detaje lidhur me draftin, ku ka shpjeguar se do të rishpërndahen 46 miliardë lekë, ndërkohë që parashikohet rritje të planit vjetor të të ardhurave me 7.5 miliardë lekë.

“Nëpërmjet këtij akti normativ rishpërndahen rreth 46 miliardë lekë, me synim përshpejtimin e projekteve me performancë pozitive dhe nxitjen e rritjes ekonomike. Kjo bëhet e mundur edhe falë një ecurie pozitive të sektorit energjetik, i cili nuk ka pasur nevojë për mbështetjen buxhetore të parashikuar në fillim të vitit.

Nëpërmjet aktit normativ mbështetet procesi i rindërtimit me afro 12 miliardë lekë, me synim avancimin dhe përmbylljen sa më të shpejtë të këtij procesi.

Gjithashtu, alokohen rreth 1.8 miliardë lekë për skemën e naftës dhe skemat e mbështetjes së fermerëve, për të cilat Ministria e Bujqësisë do të sigurohet për disbursimin e tyre deri në fund të vitit.

Parashikohet një shtesë për fondin e ish-të përndjekurve politikë, me synim përshpejtimin e pagesave për këtë kategori përfituesish. Akti normativ mbështet gjithashtu projektet në infrastrukturë, kryesisht në rrugë, ujësjellësa dhe kanalizime. Ndërkohë, parametrat makro-fiskalë vazhdojnë të synojnë uljen e borxhit publik, duke mbajtur të pandryshuar defiçitin buxhetor”, tha Mete.

Ky rishikim i buxhetit është i pari për këtë vit, ndërkohë që vitin e kaluar u bënë tre ndërhyrje të tilla.