Ky ka qenë viti më i mirë turistik që është shënuar ndonjëherë. Sipas të dhënave të Instituti të Statistikave, gjatë periudhës janar-gusht rreth 7.2 milionë shtetas të huaj kanë hyrë në territorin shqiptar, me rritje 26.9 %, krahasuar me të njëjtën periudhë të një viti më parë.
Vetëm në gusht kanë hyrë në Shqipëri rreth 2 milionë shtetas të huaj ose 18.3% më shumë se në gushtin e 2022-it.
Të dhënat e detajuara tregojnë se në gusht 2023, krahasuar me gusht 2022, hyrjet e shtetasve të huaj janë rritur: për qëllime personale me 18.2 %; për qëllime pushime, vizitë tek të afërm, etj. me 22.5 %; për biznes dhe qëllime profesionale me 34.1 %.
Daljet e shtetasve
Daljet e shtetasve shqiptarë nga territori i Shqipërisë, gjatë muajit gusht 2023 janë 842.940. Krahasuar me gusht 2022, ky tregues është rritur me 8,9 %. Daljet e shtetasve të huaj nga territori i Shqipërisë gjatë muajit gusht 2023, janë 2.171.807. Krahasuar me gusht 2022, ky tregues është rritur me 25,9 %. Numri i shtetasve shqiptarë të dalë nga territori i Shqipërisë gjatë tetëmujorit 2023, është 4.577.753, duke u rritur me 18.9 %, krahasuar me të njëjtën periudhë të një viti më parë.
