Euro e dobët, eksportuesit kërkojnë masa. Letër të dytë kryeministrit

Eksportuesit i kanë dërguar një letër të dytë kryeministrit Rama, në të cilën i kërkojnë marrjen e masave ndaj zhvlerësimit të euros. Letra i është drejtuar edhe guvernatorit Gent Sejko dhe ministres së Financave dhe Ekonomisë, Delina Ibrahimaj.

Eksportuesit kërkojnë harmonizimin e politikave fiskale me ato monetare.

“Vlerësojmë se së bashku me shoqatat e eksportuesve, duhet të krijohet një grup ndërinstitucional për të identifikuar dhe zbatuar politika adekuate monetare e fiskale dhe reforma strukturore që nuk cënojnë stabilitetin makroekonomik, por që zbusin goditjet e rënda nga mbiçmimi i monedhës kombëtare. Masat mbështetëse të bazuara në eksperiencat e vendeve të tjera, nuk dëmtojnë objektivin kryesor të Bankës së Shqipërisë për arritjen dhe ruajtjen e inflacionit në nivelin 3% dhe nuk dëmtojnë sadopak stabilitetin e financave publike”, theksohet në letër.

Në paketën e re të masave që ata i kanë propozuar ekzekutivit përfshihen nisma si deeuroizimi i ekonomisë, luftimi i parasë informale dhe që qarkullon jashtë bankave, vendosjen e një kufiri tavan për shumat që mund t’i lejohet këmbimi në pika valutore.

Ata gjithashtu kërkojnë që të rishikohet regjimi i kursit të këmbimit, për ta bërë atë nga të lirë në gjysmë të lirë, që nënkupton vendosjen e fashave ku mund të luhatet leku.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Nga krahu tjetër eksportuesit kërkojnë nga qeveria subvencion për humbjet që kanë pësuar në periudhën e zhvlerësimit. Sipas tyre duhet që fitimet e tepërta e të importuesve ne këtë periudhë t’u rialokohen me qëllim mbulimin e humbjeve.

Ata gjithashtu kërkojnë ngrirjen e pagesave të tatim fitimit për vitin 2023.