LIGJET E BIZNESIT
Borxhi publik, defiçiti buxhetor dhe inflacioni janë disa nga komponentët kryesorë, sipas ekspertëve të ekonomisë, që ndikuan në ndryshimin e vlerësimit për Shqipërinë nga një vend me perspektivë të qëndrueshme në atë pozitive.
Vlerësimi i Agjencisë ndërkombëtare “Standard & Poor’s”, sipas ish-ministrit të Financave, Arben Malaj, do të përkthehet në përfitim për shumë sektorë, por më kryesorja në uljen e kostos së borxhit në ekonomi.
“Përftimi i parë që ka qeveria shqiptare është që kur operon në tregje ndërkombëtare për të marrë kredi, në bazë të këtij vlerësimi, e marrim huanë në një kosto më të ulët. Dhe për një hua me kosto të ulët dhe borxh i lartë, përfitimi i parë është që ulet kostoja e borxhit në ekonomi”, shpjegoi Malaj për A2 CNN.
Parashikimi i Agjencisë së vlerësimit se inflacioni do të bjerë gradualisht në nivelin e targetuar prej 3%, sipas Malajt, do të jetë një sfidë, pasi ende është shumë i lartë, sidomos inflacioni ushqimor: “Niveli i inflacionit është i lartë dhe godet aftësinë paguese të klasës së mesme. Harmonizimi i politikave monetare dhe fiskale dhe vënia në përparësi e reformave sturkturore do të mbajnë në kontroll inflacionin”.
Në sektorin e jashtëm, Malaj thotë se do të ndikojë kryesisht në rritjen e investimeve të huaja në vend: “Nëse një vend merr një vlerësim pozitiv nga këto kompani audituese, investitorët potencial e shohin si një normë fitimi të mirë dhe të garantuar. Përfitimet potenciale janë të larta, përfitimet reale varen nga menaxhimi i përgjithshëm i ekonomisë shqiptare”.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Por, në bazë të evoluimit të situatës ekonomike, Malaj thotë se këto vlerësime mund të ndryshojnë me kalimin e kohës nëse nuk ndërmerren reformat e duhura për përmirësimin e parametrave ekonomikë./A2 CNN
