LIGJET E BIZNESIT
Që edhe këto pushime vero1re do të ishin “të kripura”… kjo dihej. Kjo si pasojë e inflacionit ende në nivele të larta te pushimet, pijet, transporti që rrjedhimisht ndikojnë edhe te akomodimi.
Rrjedhimisht, këtë vit sipas pyetësorit të kryer nga Barometri i Ballkanit, 60 për qind e shqiptarëve pohuan se nuk mund të përballojnë shpenzimet për një javë pushime në vit.
Megjithatë, zgjedhjet për të kaluar pushime disi më të lira nuk mungojnë. Plazhet në veri të vendit, Shëngjin e Velipojë mund të jenë dy opsione. Çmime të përballueshme ofron edhe Durrësi e një pjesë e Vlorës. E njëjta nuk mund të thuhet për Sarandën, Palasën apo Dhërmiun ku një çift mund të zgjedhë të paguajë nga 75 deri në 200 euro për të fjetur një natë.
Me gjithë shtrenjtimet, Shqipëria vijon të ofrojë çmime më të ulëta se vendet europiane e madje Rajonit. Sipas platformës Booking, një çift mund të akomodohet në plazhet e vendit për mesatarisht 65 euro, shifër kjo më e ulët se ajo që një turist do duhej të paguante në Turqi, Malin e Zi, Greqi. Itali apo Maltë.
“Normalisht ne jemi me një ofertë më të lirë se vendet e Rajonit, por me diferenca jo fort të mëdha. Kjo diferencë do të ngushtohet edhe më tej në vijim. Për çmimet e kontratave të mbyllura për vitin 2024 ne kemi çmime thuajse të njëjta me Greqinë, Malin e Zi, Kroacinë etj.”, thotë Rrahman Kasa, kryetar i Unionit Turistik Shqiptar.
Shqipëria duket se po shkon drejt vitit më të mirë historik të turizmit, edhe në drejtim të parave të shpenzuara nga këta të fundi. Të dhënat e Bankës së Shqipërisë në bilancin e pagesave tregojnë se shpenzimet e të huajve në Shqipëri në 3 muajt e parë të vitit arritën në një nivel prej 624 milionë euro ose rreth 5 për qind më shumë se tremujori i parë i vitit 2022./A2 CNN
