Detyrimet e prapambetura arrijnë në 182 mln euro, qeveria në borxh me qytetarët dhe bizneset

Qeveria nuk po shpëton dot nga borxhet, pavarësisht ecurisë shumë të mirë të të ardhurave n buxhet. Sipas të dhënave zyrtare nga Ministria e Financave, detyrimet e prapambetura të qeverisë ndaj operatorëve private që kanë kontrata me qeverinë arritën në fund të qershorit 2023 në 18,8 miliardë lekë (182 milionë euro) me një rritje 50 për qind që nga fundi i vitit dhe 25 për qind në krahasim me qershorin e vitit 2022.

Rritja ka ardhur nga zëri “detyrime të tjera” që ka arritur në rreth 14 miliardë lekë nga 8 miliardë lekë që ishte në fund të vitit. Në këtë zë përfshihen detyrimet e krijuara nga pushteti lokal dhe vendime që burojnë nga gjykatat e vendit dhe ato ndërkombëtare  dhe që duhen zbatuar nga buxheti.

Pas ardhjes në pushtet në vitin 2013, kryeministri Rama u zotua se nuk do të krijoheshin më detyrime të prapambetura ndaj palëve të treta, një premtim qartazi i pambajtur.