Emigracioni i lartë, por edhe problemet ekonomike dhe infertiliteti kanë ulur ndjeshëm numrin e lindjeve, duke ngritur alarmin për të ardhmen e popullsisë. Të dhënat e fundit të Institutit të Statistikave tregojnë se numri i lindjeve për tremujorin e dytë të këtij viti ishte 5.119, duke shënuar një rënie me 8,2 %, krahasuar me të njëjtën periudhë të një viti më parë.
Megjithatë shtesa natyrore ishte pozitive, pasi vdekjet ishin më të ulëta se në 6-mujorin e parë. INSTAT raportoi se shtesa natyrore e popullsisë për tremujorin e dytë 2023 rezulton pozitive, duke regjistruar 465 lindje më shumë se sa vdekje. Numri i vdekjeve për tremujorin e dytë 2023 është 4.654, duke shënuar një rënie prej 8,1%, krahasuar me tremujorin e dytë 2022.
Lindjet sipas qarqeve
Sipas të dhënave të INSTAT-it, në tremujorin e dytë të këtij viti, një qark i vendit shënoi rritje të numrit të lindjeve, ndërsa njëmbëdhjetë qarqe të tjera shënuan ulje, në krahasim me tremujorin e dytë 2022.
Qarku me numrin më të lartë të lindjeve është Tirana me 1.846 lindje, ndërsa qarku me numrin më të ulët është Gjirokastra me 84 lindje. Rritjen më të madhe në përqindje të lindjeve, gjatë tremujorit të dytë 2023, krahasuar me tremujorin e dytë 2022 e ka qarku i Vlorës me 2,4 %, ndërsa rënien më madhe e ka qarku i Beratit me 19,2 %.
