Ekonomia ëhstë ngadalësuar në tremujorin e parë të këtij viti. Instituti i Statistikave raporton se në këtë periudhë, ekonomia iu rrit me vetëm 2.72% kundrejt tremujorit të parë të vitit 2022. Ky është ritmi më i ulët i rritjes që nga tremujori i tretë i vitit 2020, kur vendi po vuante pasojat e pandemisë.
Sipas të dhënave të INSTAT, ndikim pozitiv në rritjen ekonomike kanë dhënë degët: Aktivitete të pasurive të paluajtshme me +0,62 pikë përqindje, Arte, argëtim dhe çlodhje; aktivitete të tjera shërbimi me 0,60 pikë përqindje, Administrata publike, Arsimi dhe Shëndetësia me +0,53 pikë përqindje, Tregti, Transport, Akomodim dhe Shërbim ushqimor me +0,50 pikë përqindje, Ndërtimi me +0,42 pikë përqindje, Informacioni dhe Komunikacioni me +0,19 pikë përqindje, Industri, Energji dhe Uji me +0,16 pikë përqindje, Bujqësi, Pyje dhe Peshkim me +0,11 pikë përqindje, Aktivitete Financiare dhe të Sigurimit me +0,10 pikë përqindje.
Negativisht kontribuoi grupi: Aktivitete profesionale dhe Shërbime administrative me -0,14 pikë përqindje. Taksat Neto mbi produktet kontribuuan negativisht me -0,38 pikë përqindje.
Ngadalësimi I ritmeve të rritjes së ekonomisë reflekton pasojat që po sjell emigracioni i lartë që ka prekur konsumin dhe rritja e çmimeve. Qeveria shqiptare dhe institucionet financiare ndërkombëtare, si FMn dhe Banka Botërore kanë parashikuar këtë vit një rritje më të ulët për ekonominë tonë, në nivelet 2-2.5%.
