Zgjedhjet mbaruan, euro fillon rritjen në tregun e këmbimit

Me mbarimin e zgjedhjeve, edhe euro i është rikthyer rritjes. Sipas kursit zyrtar të Bankës së Shqipërisë, monedha europiane është shkëmbyer sot me 111.3 lekë ose 0.46 lekë më shumë se fundi i javës së kaluar. Në rritje është edhe dollari. Monedha amerikane është në kuotën e 102.05 lekë ose 0.82 lekë më shumë se të premten.

Gjatë muajve të fundit, euro ka pësuar rënie të forta, të cilat kanë qenë të ndjeshme veçanërisht në gjysmen e parë të majit. Më 11 maj, moendha europiane zbriti në minimumin historik të 110.6 lekëve, niveli më i ulët i regjistruar ndonjëherë. Ndërkohë që kundrejt një viti më parë, euro është zhvlerësuar me 8%.

Rënia e euros në tregun tonë të këmbimit është pasojë e ofertës së lartë. Thënë ndryshe, sasisë së madhe të kësaj valute në qarkullim. Sipas Bankës së Shqipërisë dhe Ministrisë së Financave, kjo ofertë shpjegohet me burimet formale nga ka hyrë euro, si niveli i lartë i remitancave, invetsimeve të huaja dhe të ardhurave nga turizmi. Ndërkohë që agjentët e tregut të këmbimit shpjegojnë se një sasi e madhe valute ka hyrë në rrugë informale, me qëllim financimin e fushatës zgjedhore.