LIGJET E BIZNESIT
Eksportuesit shqiptarë kanë vlerësuar dy masat e ndërmarra nga qeveria për t’i ndihmuar ata në këtë periudhë të zhvlerësimit të euros, nga e cila preket drejtpërdrejtë. Bëhet fjalë për reduktimin e rimbursimit të TVSH-së në 3 ditë nga 30 ditë që është aktualisht me afat ligjor dhe ngrirjen e mospagimit të tatim-fitimit për një vit.
Edvin Prence, kryetar i Shoqatës Pro-eksport Albania, që mbron interesat e industrisë shpjegon për Fast News Economy se këto janë masa emergjente dhe afatshkurtra që ndihmojnë eksportuesit. Por për politika afatgjata probiznes, ata janë në një dialog të strukturuar tashmë me qeverinë dhe institucionet e tjera.
“Masat afatshkurtra dhe emergjente që Ministria e Financave po ndërmerr, japin një frymëmarrje bizneseve eksportuese, të cilat që këtë fillim viti po shohin mosfaturimin normal që kanë pasur vitin e shkuar.
Mos dëshira politiko/ekonomike për një kurs këmbimi të fiksuar, ka bërë që të ngrihet një grup pune teknike me anëtarë të Bankës së Shqipërisë, Ministrisë së Financave dhe Ekonomisë, Shoqatës së Bankave të nivelit te 2 dhe përfaqësues të Shoqatave eksportuese për të ngritur mekanizmat dhe mbrojtjen e nevojshme. Kjo me qëllim që eksportuesit shqiptarë të mos gjenden të papërgatitur përballë ngjarjeve të tilla, që natyrisht mund të ndodhin në te ardhmen.
Krahas kësaj është e domosdoshme konsultimi me Ministrinë e Financave, që prodhimi Made in Albania dhe sektorët prodhues që e përfaqësojnë, të jene akoma me shume në fokus, me incentiva dhe politika zhvillimi për to”, shprehet Prence për Fast News Economy.
