LIGJET E BIZNESIT
Ndërkombëtarët i mbeten qëndrimit të tyre kundër amnistisë fiskale, pavarësisht deklaratave të vazhdueshme të qeverisë se është në negociatat me ta për miratimin e draftit. Këshilli i Bashkimit Europian i ka bërë kërkesën e radhës qeverisë shqiptare që të tërhiqet përfundimisht nga nisma.
“Shqipëria duhet të shmangë çdo skemë apo masë tjetër si ligji për amnistinë fiskale dhe kriminale, e cila do të komprometonte ose minonte rreshtimin me politikat e Bashkimit Europian, duke përfshirë procedurat dhe masat e BE që synojnë parandalimin e pastrimit të parave dhe evazionit fiskal”.
Në dokumentin e Këshillit, ku skanohet ecuria ekonomike e vendit, paralajmërohet se miratimi i amnistisë fiskale do të vuloste qëndrimin e Shqipërisë në “listën gri” të pastrimit të parave.
“Ligji për amnistinë do të minonte gjithashtu plotësimin e kritereve të nevojshme për të nxjerrë Shqipërinë nga lista gri e pastrimit të parave”.
Në dokument, Këshilli i sugjeron qeverisë që të rrisë të ardhurat në buxhetin e shtetit përmes masave fiskale që janë miqësore me rritjen ekonomike. Sipas raportit rritja e të ardhurave në raport me Prodhimin e Brendshëm Bruto është jetësore për të financuar rritjen e nevojshme të investimeve në drejtim të infrastrukturës dhe burimeve njerëzore.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
