Shteti 108 milionë euro borxh ndaj qytetarëve dhe bizneseve

Vlerësohet në rreth 12.2 miliardë lekë ose 108 milionë euro borxhi që shteti u ka qytetarëve dhe bizneseve. Këtu përfshihen detyrime të papaguara nga qeveria qendrore dhe ajo vendore. Sipas të dhënave të Ministrisë së Financave, gjatë vitit 2022, borxhi është ulur me 1 miliardë lekë kundrejt një viti më parë. Në vitin 2021, këto detyrime kapnin në total 13.2 miliardë lekë.

Peshën më të madhe të stokut e mban qeveria qendrore me rreth 6.2 miliardë lekë. Ndërsa bashkitë ka akumuluar një vlerë prej 5.9 miliardë lekësh. Së fundmi ndaj pushtetit vendor është ndërmarrë një iniciativë ligjore e cila i detyron bashkitë që fondet e trashëguara nga një vit më parë t’i përdorin për të shlyer detyrimet e prapambetura.  Borxhet më të mëdha i takojnë zërit të investime, ku bëhet fjalë për projekte të punëve publike për të cilat ende nuk janë bërë pagesat ndaj kompanive dhe që detyrimet arrijnë në vlerën e 4.78 miliardë lekë.

Në vendin e dytë për nga pesha që zënë në stokun total të detyrimeve të prapambetura renditen vendimet gjyqësore, të cilat regjistrohen në 3.76 miliardë lekë dhe kanë të bëjnë kryesisht me largime të padrejta nga puna në administratën publike apo çështje të hapura kundrejt shtetit shqiptar. Në shifra të ulëta renditen zëra të tjerë, si shërbime, mirëmbajtje, sigurime shoqërore, sigurime shëndetësore, etj.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern