LIGJET E BIZNESIT
Euro ka zbritur në nivele rekord në tregun tonë të këmbimit, duke ngritur pikëpyetje lidhur me atë që po ndodh në tregun e këmbimit. Të ftuar në emisionin A2 Business të gazetares Aurora Sulçe ekspertët e ekonomisë vlerësuan se faktorët që po ndikojnë janë burimet informale që kanë shtuar sasinë e euros në qarkullim, por edhe shpenzimet e fushatës së zgjedhjeve vendore të 14 majit.
“Duhet të kuptojmë që nuk po zhvlerësohet euro, por po forcohet leku. Ky është një fenomen lokal, një fenomen i tregut të mbyllur brenda Shqipërisë. Kjo ka disa arsye, por kryesorja ka të bëjë me balancat në treg. Për aq kohë sa nuk kemi një rritje të sasisë së lekut në qarkullim, i bie që është shtuar sasia e valutave të tjera. Kjo ka sjellë zhvlerësimin e këtyre monedhave”, ka shpjeguar Artan Gjergji, ekspert për tregjet financiare.
Ndërsa ekspertja për ekonominë, Eriola Hoxha, ia faturoi financimit të fushatës zgjedhore të zgjedhjeve të 14 majit rënien drastike që ka pësuar euro. Ajo u shpreh se financimi i fushatës nga bizneset dhe burimet e krimit ka peshën më të madhe në këtë rënie të kësaj monedhe.
“Mbiçmimi i monedhës shqiptare, lekut dhe nënçmimi i euros, sipas të dhënave zyrtare të kursit të Bankës së Shqipërisë, i cili e ka shënuar kulmin në 28 dhjetor, në 7 prill dhe 11 prill, i referohet shumë burimeve informale të kësaj dukurie, konotacioni të ri ekonomik që ne jemi mësuar dy vitet e fundit që është bërë i përhershëm në ekonominë shqiptare.
Kjo dukuri faturohet edhe me zgjedhjet vendore që mbahen në 14 maj, pasi sipas edhe KQZ-së, janë bërë përmirësime në Kod, por nuk janë në masën që të parandalojnë financimin e fushatës nga biznese të ndryshme dhe burime të krimit”, u shpreh Hoxha.
