Tjetër goditje për euron, zbret nën 114 lekë

Euro ka zbritur nën kuotën e 114 lekëve, duke shënuar nivelin më të ulët të këtij viti. Sipas kursit të Bankës së Shqipërisë, monedha europiane u shkëmbye me 113.9 lekë. Me shpejtësi euro po iu afrohet niveleve më të ulëta historike, që u shënuan në fund të dhjetorit të vitit të kaluar. Më datë 28 dhjetor 2022, euro preku edhe nivelin më të ulët historik në kursin e këmbimit me lekun, në nivelin e 112.83 lekëve.

Agjentët në tregun e këmbimit shpjegojnë se ka rënia e fortë e euros po shkaktohet nga kërkesa e dobët, pasi tregtarët dhe importuesit po blejnë më pak mallra nga jashtë dhe oferta e lartë nga remitancat dhe burimet informale.

Ndërkohë një tjetër faktor që ka ndikuar në forcimin e lekut kundrejt euros është edhe politika shtrënguese monetare e Bankës së Shqipërisë, për të rritur normën bazë të interesit për monedhën kombëtare. Norma bazë e interesit ka arritur aktualisht në 2.75%, nga 0.5% që ishte në mars të vitit të kaluar, kur nisën edhe ndërhyrjet e BSH-së në përpjekje për të frenuar rritjen e inflacionit.