Në fillim të vitit, bonot e thesarit dhe obligacionit ishin ndoshta alternativa më e mirë e investimit, me risk zero. Kjo pasi ndërhyrjet e vazhdueshme të Bankës së Shqipërisë për të rritur normën bazë të interesit për lekun në përpjekje për të luftuar inflacionin, cuan në një rritje edhe të interesave të këtyre letrave me vlerë. Arsye pse edhe kryeministri vazhdimisht apeloi qytetarët që të investonin në bono dhe obligacione, duke financuar kështu borxhin e qeverisë.
Por cfarë ka ndodhur tre muaj më pas?
Rritja e interesave të letrave me vlerë të qeverisë u shoqërua me rritje të interesit nga ana e qytetarëve për të investuar, gjë që ka cuar në rënien e ndjeshme të interesave të tyre. Të dhënat e Bankës së Shqipërisë tregojnë se marsi ka thelluar edhe më tej tendencën rënëse të bonove të thesarit.
Këtë javë kanë qenë bonot me afat maturimi 12 mujor ato që kanë shënuar uljen e radhës. Nga norma 3.98% e regjistruar në ankandin e ditës së fundit të shkurtit, ato kanë rënë në ankandin e kësaj jave në kuotën 3.91%, duke ju afruar kështu gjithnjë e më shumë normave të depozitave bankare. Norma ka rënë më tej në mars, megjithëse ka pasur më shumë interes për investime në këtë instrument në raport me ankandin e fundit të shkurtit.
E njejta tendencë vërehet në të gjitha llojet e instrumenteve, përvec bonove tre mujore, të cilat shënuan një rritje minimale në ankandin e fundit. Në këtë mënyrë, interesat e bonove të thesarit po i afrohen normave të depozitave bankare, veçanërisht duke parë disa paketa ofertash me të cilat janë hedhur në treg bankat tregtare për të konkurruar bonot e thesarit.
Nga të dhënat zyrtare të Bankës së Shqipërisë për muajin janar, raportohen interesa deri në 3.5% për depozitat dyvjeçare. Po ashtu, të paktën 4 banka të nivelit të dytë propozojnë interesa mbi 3.5% për depozita me afat mbi 60 muaj.
Për depozitat me afat 1-vjeçar gjenden në treg oferta deri 3%. Kjo tendencë ka shtyrë veçanërisht individët të transferojnë kursimet drejt depozitave me afat, duke u bërë kështu konkurrencë të fortë të letrave me vlerë të qeverisë.
