Java e Parasë çelet nën moton: “Administro paratë e tua, kultivo të ardhmen tënde!”

Banka e Shqipërisë çel Java e Parasë për vitin 2023. Kjo javë, që do të jetë e mbushur me aktivitete të ndryshme, synon ndërgjegjësimin e fëmijëve dhe të rinjve për të qenë qytetarë të ardhshëm të përgjegjshëm dhe të aftë për të marrë vendime financiare të mirëmenduara.

Motoja e Javës së parasë për këtë vit është: “Administro paratë e tua, kultivo të ardhmen tënde!”

Guvernatori Gent Sejko deklaroi se kultura dhe përfshirja është një prej objektivave më të rëndësishëm të punës së Bankës Qendrore, që ka punuar edhe për ngritjen e një strategjie me objektiva dhe plane veprimi për të rritur edukimin.

“Me gjithë ndërhyrjet e qenësishme të qeverive dhe bankave qendrore në mbarë botën, në përgjigje të këtyre goditjeve të njëpasnjëshme dhe të fuqishme në ekonomi, ku përfshihen paketat ndihmëse, kontrollet mbi çmimet dhe ndërhyrjet e politikës monetare, vlerësojmë se efektshmëria e tyre është e lidhur pashmangshmërisht me një ambient me nivel të lartë kulture dhe përfshirjeje financiare. Një individ i kulturuar financiarisht – pra që zotëron njohuritë, tregon sjelljen dhe mban qëndrimet e duhura financiare – jo vetëm merr vendime të mirinformuara në marrëdhëniet e tij të përditshme financiare, por dhe kupton dhe reagon në mënyrën e duhur ndaj mesazheve të autoriteteve politikëbërëse, duke i bërë më efektive masat e marra prej tyre.

Po ashtu, një individ i përfshirë financiarisht është në gjendje të përfitojë sa më shumë nga produktet e shërbimet novatore në dispozicion, dhe falë kulturës financiare di të lundrojë në mënyrë të sigurt në një treg financiar që evoluon me shpejtësi. Për këto arsye, Banka e Shqipërisë e ka shndërruar kulturën dhe përfshirjen financiare në një prej objektivave të rëndësishëm të mandatit të saj, duke e bërë pjesë integrale të detyrave të saj institucionale,” u shpreh Sejko.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Pjesë e fushatës edukuese është edhe leximi i drejtë i vlerës së kartëmonedhave, për të hequr termin lekë i vjetër.