Amnistia fiskale do të bëhet, qeveria po harton kuadrin nënligjor mbështetës

Qeveria shqiptare mbetet e vendosur që të zbatojë amnistinë fiskale, pavarësisht kundërshtimeve të partnerëve ndrëkombëtare dhe kryesisht, Bashkimit Europian.  Ministrja e Financave dhe Ekonomisë, Delina Ibrahimaj ka deklaruar se paralel me konsultimin e projektligjit të amnistisë fiskale, po punohet edhe për hartimin e akteve nënligjore që do të garantojnë zbatimin e tij me korrektësi dhe transparencë.

“Amnistia fiskale është ligj që tashmë është në një fazë të pjekur, pasi është konsultuar gjerësisht si me grupet e interesit në vend, edhe me institucionet përgjegjëse për zbatimin e këtij ligji, por edhe me të gjithë aktorët ndërkombëtarë”, u shpreh ajo.

Ministrja Ibrahimaj theksoi se proceset e konsultimit kanë vijuar gjatë dhe diskutimet si me BE-në, por edhe me partnerë të tjerë ndërkombëtarë janë ende në proces.

“Ne e kemi theksuar shpeshherë se është e rëndësishme që ky projektligj të jetë i hartuar si duhet, por është shumë e rëndësishme gjithashtu që të vijë i zbatuar si duhet. Ne jemi paralelisht duke punuar për aktet nënligjore që do të shoqërojnë projektligjin të cilat janë po aq të rëndësishme sa projektligji vetë, pasi do të garantojnë zbatimin e tij me korrektësi dhe transparencë”, deklaroi ministrja.

Ibrahimaj theksoi se është një projektligj i vështirë dhe do të dojë kohën e tij për t’u përfunduar, ashtu sikurse do të duan edhe kohën e vetë aktet nënligjore për të qenë gati.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern