Informaliteti ka qenë një problem i përhershëm i ekonomisë shqiptare, i evidentuar nga të gjitha qeverisë, por të gjitha kanë dështuar që ta luftojnë. Informaliteti është i pranishëm në shumë sektorë dhe veçanërisht tek pagat, ku shumë biznese i kanë punonjësit në të zezë ose me paga të nëndeklaruara.
Panorama doli e qartë pasi databaza e pagave u bë publike dhe kjo çoi në një riaktivizim të aksionit antiinformalitet nga qeveria, të marrë disa herë që kur socialistët erdhën në pushtet në vitin 2013.
Zef Preçi, ish-ministër i Ekonomisë, i ftuar në studion e “A2 Business” të gazetares Aurora Sulce deklaroi se “edhe nëse ka vullnet të mirë nga bizneset për të paguar taksa, ka nevojë për disa elementë të tjerë në mënyrë që reformat apo aksionet antiinformalitet të funksionojnë”.
Sipas tij, për informalitetin në vend nuk ka të dhëna sepse “autoritetet ekspozojnë vetëm arritjet”.
Ndërsa Ilir Ciko, ekspert për ekonominë, theksoi se “përpjekjet që janë bërë janë kryer në bazën e fushatave”.
“Nëse nuk ka një qasje të përgjithshme që do të adresojë problematikën, lufta do të mbetet afatshkurtër dhe është e prirur vetëm që të ndihmojë qeverinë kur nuk realizon të ardhurat e saj”, shprehet Ciko.
